Aizawl FC an ropui; Chanmari an zuih
I League Second Division-ah MPL3 champion Aizawl FC a zawnin vawi ruk an chak ta a, Phase 1 kharnaa an hmachhawn tur Chanmari FC erawh PIFA nen an inhnehtawk thung. Aizawl FC-in point 18 hmuin hmahruaitu an ni a, khelh zat inangah Chanmari FC-in point 11 an hmu ve tawh bawk.
Nimina Kanchenjunga Stadium-a inkhelah Aizawl FC-in United SC lehthalin 4-2 in an chak a, SSB Ranidanga Ground-ah Aizawl FC-in 6-1 zeta an sawp PIFA chu 3-3 in an draw.
Aizawl FC an kal zel
United SC-in Rajon Barmon hmangin minute 14-naah an khung nghal a, Aizawl FC-in second half ṭan tirha Zoramthara tauh luh hmangin an sut chauh.
Amaherawhchu Aizawl FC defender Thomas Lalengkima'n an lama a tih luh vangin United SC-in hma an hruai nawn a, Aizawl FC point hloh thei dinhmunah an ding.
Aizawl FC-in an nawr nat rah an seng a, minute 73-naa Eze Kingsley-a'n an lama a tih luh zarah Aizawl FC in an draw a. Hemi hnu hian chak ngei tumin defender Emma aiah forward Justin Morgan an lut tir bawk.
Aizawl FC tan foreigner Alfred Kemah Jaryan leh subsititute Justice te'n goal khat ve ve an khung belh a, 4-2 in hnehna an chang.
Aizawl FC coach K. Malsawmkima chuan, "Kan chak zel thei hi kan vannei hle a ni. Kan siphurh kan sut theih lawk loh avangin hlauthawnna kan nei hman a, amaherawhchu a tawpah chak result kan hlawhchhuak a, kan lawm takzet a ni," tiin a sawi.
Mala chuan sawi chhunzawmin, "Siliguri-a Missionary awmte'n min ṭawiawm ṭha a, anni hian phurna nasa tak minpe a ni," a ti bawk.
Inhliam vanga buai Chanmari
Chanmari FC-in hrem vangin defender Lalrinchhana an chhawr thei lo a, inhliam vangin Lalruatthara, Ricky Lallawmawma leh Patrick Arol Enondji te an chhawr thei lo bawk. Hei vang hian defence laiah C. Lalrosanga kawppui turin Joseph Lalnunpuia chu hman a ni a, left back-ah midfielder Lalrinfela hman a ni.
Chanmari FC-in ṭum dang ang bawkin bul an ṭan ṭha a, Laldingngheta goal ṭha tak hmangin minute 9 lekah hma an hruai nghal. Chanmari-in inkhel an thunun zui a, goal dang an khung thei lawk lo. Chumai a ni lo, second half ṭantirhah PIFA-in Yarmipei Shangh leh Sandesh Gadkar te goal hmangin 2-1 in an lehthal.
Minute 78-naa Lalbiakhlua goal hmangin Chanmari-in an sut a, Keifang tlangval hian tun inelnaah goal riat a khung ta. Amaherawhchu minute nga hnu lekah PIFA zawkin Pranay Daniell hmangin goal an khung leh a, 3-2 a ni. Chanmari winger Biaktea goal khung tur chu substitute Joel Sunday-a'n a dang a, Nigeria forward hian a tihsual siam ṭhain injury time-ah F. Lalrinpuia penalty hlawhchhuah chu an siphurh sut nan a khung.
PIFA-in Chanmari laka an goal kung zat hi club dang panga an hamchhawn ṭum an goal khung zat nen a inzat chiah, chu chu Chanmari FC tlar hnung a phui tawk lo tih lantirtu a ni.
Chanmari FC coach H. Vanlalthlanga chuan, "Theihtawp chu kan chhuah a, inhliam kan ngah hret avangin kan ṭang mar thei lo a ni," tiin inhliam tam chu an chak loh chhana a ngaih thu a sawi.
Inkhel Result
United SC 2 - 4 Aizawl FC
United SC : Rajon Barmon 14'(P); Thomas Lalengkima 50' (OG).
Aizawl FC : B.Zoramthara 46'; Eze Kingsley 73'(OG); Alfred Kemah Jaryan 83'; Justice Morgan 89'.
Chanmari FC 3 - 3 PIFA
CFC : Laldingngheta 9'; Lalbiakhlua 78'; Joel Sunday 90+3' (P).
PIFA : Yarmipei Shangh 46'; Sandesh Gadkar 58';
Pranay Daniell 83'.
Starting Eleven : Chanmari FC
Goalkeeper: Lalawmpuia; Defenders : Lalrinfela, Joseph Lalnunpuia, C. Rosanga, Lalhriatrenga (Achia); Midfielders : Rochhingpuia (C), Laldingngheta, Malsawmfela, F. Lalrinpuia, Lalbiakhlua; Striker : Lalruatfela Zote
Starting Eleven : Aizawl FC
Goalkeeper : Zothanmawia; Defenders : Lalrozama, Emma Chigozie, Lalṭhakima, Lalrozama; Midfielders: Albert Zohmingmawia, H. Lalbiakthanga, David Lalrinmuana, Reuben Zosangpuia, Zoramthara; Forward : Alfred Kemah Jaryan