Bayer Leverkusen-in Spahic contract titawp

Bayer Leverkusen chuan an defender Emir Spahic contract neih lai chu an tih tawp sak. Kar hmasa khan Leverkusen hian German Cup-ah Bayern Munich an hneh lo a, hemi ṭum hian Spahic chu security nen an insual.

Kum 34-a upa Spahic hian kum 2013 khan 2016 thleng cham turin Leverkusen hi a zawm. A club tan hian match 48 khel tawhin goal thum a khung tawh. Player pawimawh tak ni mah se a thil tih mawi lo tak avangin a contract a hman zawh hmain club-in an tih tawp sak a ṭul ta a ni.

Leverkusen managing director Michael Schade chuan, "Nilaini a thil thleng kha a mawi lo takzet a, video kan enlet khan kha thil thleng khan min barakhaih vek a ni. Duhthlan tur dang kan nei thei tawh lo a, he thutlukna hi kan siam a ṭul ta a ni. Ani pawhin a pawm thiam kan beisei a, a kal leh zelna turah duhsakna kan hlan e," tiin a sawi.

Bosnia international Spahic chuan, "Ka thil tihah ngaihdam ka dil e, ka chhungte leh club chungah ngaihdam ka dil tak meuh meuh a ni. Player ṭha leh ropui tak tak zinga ka inkhel ve kha ka tan chuan a hlu a, ka ṭhiante an kal leh zelna turah duhsakna sang ber ka hlan. Fan-te pawn min ngaihdam theih ngei ka beisei," tiin ngaihdam a dil nasa hle.