Manchester khaw rawng a sen leh ta

Old Trafford-ah Manchester City forward Sergio Aguero-a'n bul a ṭan a, a tawp a khar bawk. Argentine forward goal hnih thun karah Manchester United tan Ashley Young, Marouane Fellaini, Juan Mata leh Chris Smalling te'n goal an khung a, Pathianni zan Manchester Derby-ah Louis van Gaal-a hote 4-2 in an chak.

City-in khualmuala Liver­pool, Burnley leh Crystal Palace te a zawna an hneh loh hnuin result ṭha zawk an beisei a, inkhelh ṭan tirh lamah United player an chaih phar nasa hle. Kil tin aṭangin City an hlauawm a, Spanish winger Jesus Navas-a'n chance ṭha a hlah hnuah David Silva pass chu awlsam takin Aguero-a'n minute 8-na lekah a khung a, United tlar hnung chu pherh tak a ni.

Player manto Angel di Maria leh Radamel Falcao te'n bench aṭangin an thlir a, keeper David de Gea ball pet chhuah ṭhat vangin tunhnaia che ṭha Young-a'n United tan a sut. Hemi hnu hi chuan United game a ṭha chho a, minute 27-naah goal hmahruai khungtu Young-a ball vawrh chu Fellaini-a'n a tauh lut a, Belgian midfielder hi offside niin a lang.

Second half-ah Daley Blind tlawh vanga yellow card hmu Vincent Kompany aiah Eliaquim Mangala luh tir a ni a, City buaina a kiang lo. Minute 52-naa Wayne Rooney freekick chu keeper Joe Hart-a'n ṭha taka a dan hnuah Michael Carrick-a'n goal khung belhna chance a nei a, City an him hram.

United game a ṭha chhun­zawm a, minute 67-naah Rooney pass chu Mata-a'n ṭha taka a lak luh hnuah 'cool' takin Hart-a kap karah a khung, Spanish midfielder hi offside-in lang mah se assitant referee-in a hmuh hmaih miau avangin 3-1 a ni.

Minute 73-naah United bawkin goal an khung a, Young-a freekick chu changtu nei lo Smalling-a'n chiang zetin a tauh lut. Hemi hnu hian Falcao leh Di Maria te field chhungah an inlan a, goal an keng tel lo. United midfield thahrui Carrick chu inhliam vangin a chhuak a, thlak theih a nih tawh loh avangin mualneitu lam 10-in an khel a; minute 89-naah Aguero-a'n City goal hnihna a khung leh a, 4-2 in inkhel a tawp.

Harhtharna

March 21-ah Manchester United-in Liberty Stadium-ah Swansea City an hneh lo a, khami hnu khan Premier League match ruk an khel leh tawh a, an chak vek. An club hneh zingah Tottenham Hotspurs, Liverpool leh Manchester City te an tel. Dutch manager hnuaiah United-in game kalphung nghet an nei ṭan a, player pawimawh chu Di Maria leh Falcao te ni loin season liamtaa sawisel luih luih Belgian palian Fellaini a ni daih.

United hi derby match-a an chak avangin Manchester City aiin point liin an sang fal tawh a, match ruk chiah khelh tur a awm tawh. Van Gaal-a hote hian an chunga awm Chelsea leh Arsenal an la hmachhawn dawn a, Champions League khel turin an dinhmun a la chiang bik lo.

Eng nge an sawi?

Manchester United manager Louis van Gaal chuan, "City aiin point liin kan sang tawh a, chu chu thu lawmawm tak a ni. Season tira kan tum kha chu a sang pali zinga awm a ni a, kan tum kan tih hlawhtlin theih chuan ka lawm khawp ang. Ed Woodward (executive vice-chairman) hnenah a harsat tur thu ka hrilh a, mahse tunah chuan palina chinah chuan kan awm a, match ruk hmabak kan la nei a, kan hna kan la zo lo," tiin pathumna dinhmuna a lungawi thu a sawi.

2011 hnua derby match an chak lehna hmasa ber chungchang sawiin Dutch manager chuan, "Ka lawm takzet a ni. Fan-te hian result ṭha hi an phu a, player leh staff-te chuan an hlimna siam sak hi kan duh a ni," a ti.

Manchester City manager Manuel Pellegrini chuan, "Ka mawhphurhna a ni a, tuna kan harsatna sut kian theih dan chu chak a ni. A pawimawhna ka hriat loh avangin ka hna chungchang sawi ka tum lo," tiin an result ṭha lo chu a thiam loh a nih thu a sawi.

City hi champion lai an ni a, January thla khan tuna hmahruaitu Chelsea nen hian an point hmuh zat a inang. Amaherawhchu kum 2015-ah City hian Premier League-a point 39 hmuh theihah point 18 chiah an hlawhchhuak a, Champions League aṭangin Barcelona hneh loin an tla bawk.

Pellegrini chuan sawi chhun­zawmin, "Pakhatna leh pahnih­naah kan awm char char a, tunah palinaah kan awm ta. Kan chunga awm Arsenal leh United hian Chelsea an la khel dawn a, point 18 hlawhchhuah tur a la awm a, theihtawp kan chhuah zel ang," tiin a sang pali zinga awm phak ngei an tum thu a sawi.