Champions League Zaninah Madrid derby kan hmu dawn
Zanin dar 12:15-ah Champions League quarter-final first leg inkhel hmuhnawm hmuh tur a awm dawn. Nikum final rematch-ah Madrid derby kan hmu dawn a, Atletico Madrid khelmualah Real Madrid an leng lut ang. Zanin dar 12:15 inkhel tur dangah Italian champion Juventus in French club Monaco an mikhual dawn bawk a ni.
Nikum final rematch
Champions League final 2014-ah Madrid derby kan hmu a, 4-1 in Real Madrid-in an khaw club tho Atletico Madrid an hneh. Kuminah Atletico Madrid-in phuba lakna hun ṭha an nei dawn a, quarter-final aṭanga champion lai hnawhchhuah ngei hi an tum ang.
Atletico hi an team boruak ṭhat lai tak a ni nghe nghe a, tunhnai an game hnuhnung pangaah chak lo hmel an la hmu lo. An khingpui te vawi li hnehin vawi khat an draw thung.
Real Madrid hi an match hnuhnung vawi ngaah vawi li chak hmel hmuin vawi khat an khingpui hneh loh an nei a, an hneh loh hi La Liga-a an elpui ber Barcelona an ni. Mahse, Barca an hneh loh hnuah Real player te'n goal khung an intihhmuh a, Granada phei chu 9-1 laiin an sawp nghe nghe.
Tunhnai an inkhelah Real-in Atletico hi an ngam hlei thei lo a ni ber a, zaninah erawh an tlawm hlauh a nih chuan a pawi thui khawp ang. Tunhnai an inkhel vawi ngaah Atletico chak zawkah an ṭang a, vawi khat an inhnehtawk thung. An intum hnuhnung ber February 7 khan Atletico hian an mikhual Real Madrid chu 4-0 in an lo tlawm tawh. Real player te hian Vicente Calderón Stadium-a lenluh hi an chak zawk zawk lo ang.
Juventus pawh an inlan dawn e
Zanin dar 12:15-ah Italian champion Juventus-in an khelmualah French club ṭha AS Monaco an mikhual dawn a, inkhel hmuhnawm tak a ni ngei ang.
Serie A hmahruaitu hian tunhnai an match khelh vawi ngaah vawi li chak hmel hmuin vawi khat an chak lo a, an match hnuhnung bera an hneh loh Parma hi Serie A table mawngphah luahlumtu an ni. An chak loh hlim lai taka va lenluh hi Monaco tan malsawmna a nih theih laiin milian chak lo thinrim tawn palh pawh hlauhawm tak a ni.
Monaco hi tunhnai an match ngaah chak hmel vawi hnih chiah hmu mah se zuam ngawt chi an ni lo ang. Champions League second round aṭanga Arsenal petchhuaktu an ni tih hi theihnghilh chi a ni lo. An match hnuhnung berah 3-0 a an chak bawk avangin tha tho takin Juventus khelmual hi an panin a rinawm.