UCL Preview PSG Vs Barcelona

Zlatan Ibrahimovic awm se a hmuhnawm zawk ngei ang. Chutihrualin Sweden captain tel lo pawh hian zanin dar 12:15-a Paris St Germain leh Barcelona te UEFA Champions League quarterfinal-a an inkhel tur hi mipui bengverh tak chu a ni.

French club lian leh Spanish club liante hi tun season-ah an vawi thum an inkhelhna tur a ni a, groupstage-ah awm dunin an khelmualah hnehna an chang ve ve. Zanina an inkhelna tur Parc des Princes-ah hian nikum September thla khan PSG-in 3-2 in hnehna an chang.

Hrem vangin French champion PSG-in Ibrahimovic leh Marco Verratti te an chhawr thei dawn lo a, Swedish forward hian a club hi Nou Camp-ah a hmachhawn thei ang. Ivory Coast right back Serge Aurier erawh match thum hrem tur a ni a, quarterfinal an paltlang theih chuan semifinal second leg-ah a inlan thei chauh ang. Anni bakah David Luiz leh Thiago Motta te chu malpui tha na vangin an telh theih a rinawm lo a, midfielder Yohan Cabaye leh Lucas te inkhel thei turin an kir thung ang.

PSG hi nikum season chhiar telin an khelmualah match 24 chhung hneh loh an tawng tawh lo, French club record ṭha tak tih tawp tum tur chu Barcelona an ni. Catalan club hian Daniel Alves an chhawr thei dawn lo.

Luis Enirque team-te hian inelna hrang hrang hnuhnung 34-ah vawi 30 an chak a, Inrinni khan Barca forward Lionel Messi-a'n tun season-a goal 45-na khung mah se Sevilla nen 2-2 in an inhnehtawk. Hemi ṭuma Messi nena goal khungtu Neymar chu an thlak a nih vangin a lungawi lo hle.

Brazilian forward hi match 34 a khelh tawhah vawi 15 an thlak a, Suarez erawh match 30-ah vawi 10 thlak a ni thung. Neymar lungawi lohna hi statistics aṭanga thlir chuan a dik theihna chen a awm a, a dik a nih pawhin Luis Enrique nena an boruak ṭha lo hi team tana pawi a thei a ni.

PSG midfielder Blaise Matuidi chuan, "A harsa dawn tih chu kan chiang a, kan hneh thei tih kan lantir tawh. Barca anga team ṭha hneh tur chuan 150% a kan theihna lanchhuah tir a ṭul," tiin a sawi.

Champions League-ah English club tan hmun awm tawh lo mah se English referee erawh an la lang chhunzawm zel dawn. PSG leh Barca inkhel tur hi English referee Mark Clattenburg a ni.

Inkhelh hnuhnung pali

UCL group stage, September 2014

PSG 3 - 2 Barcelona 2

PSG : David Luiz, Verratti, Matuidi

Barca : Messi, Neymar

UCL group stage, December 2014

Barcelona 3 - 1 PSG

Barca : Messi, Neymar, Suarez

PSG : Ibrahimovic

UCL quarter final, April 2013

PSG 2 - 2 Barcelona

PSG : Ibrahimovic, Matuidi

Barca : Lionel Messi, Xavi

Barcelona 1 - 1 PSG

Barca : Pedro

PSG : Pastore

Away Goal Rule-ah Barca an chak