Bihchianna Manchester City an talbuai

Manchester City hi Arab mi hausain an lei hnuin sum tam tak sengin an indin thar a, khawvel player ṭha ber ber te hlawh tam tak hlawh turin an lalut. Season ṭan tirah Premier League champion lai hian champion an sawi ri a, an sum sen dan leh players neih dan enin champion tum ngam tur an ni.

Chelsea nen hma­hruaitu nih inchuha an in um zak zak hnuah Manchester City an tawlh thlu a, Liverpool laka an tlawm hnuin khualmualah an la chak lo vek. Kum tira Champion thei dinhmuna ding kha tunah chuan Champions League khelh phak leh phak lohah an buai ta.

Manchester City fan-te chuan Old Trafford-a David Moyes-a enkawl Manchester United an hneh ṭumin diriam leh tham lo takin an au el a, an au hla chu, "Naktukah an ban dawn che," tih a ni. Pathianni zan khan Old Trafford-ah City an tlawm a, United fan te'n City boss Manuel Pellegrini chu, "Naktukah an ban dawn che," tiin an au el nasa hle. Season hmasa lawka City fan-te'n Moyes an auh elna kha an la theihnghilh lo.

Pellegrini dinhmun a derthawng a, player engemawzat hi season tharah an inlan tawh kher lo ang. Hei le tun season bika City player te bihchianna chu:-

Willy Caballero (goalkeeper)
Age: 33; Signed: 2014 (£6m); Appearances: 2
Argentine keeper Caballero hi Malaga lama Pellegrini nen lo inhrawn tawh an ni. Tun season-ah City tan vawi hnih chiah a la inlan a, goal a chhuah ve ve.
Joe Hart (goalkeeper)
Age: 27; Signed: 2006 (£500,000); Appearances: 30
England keeper Hart hian tun season-ah City tan inlan hnem berin minute 2,700 chhung a inkhel tawh. Season tharah City-in insiamṭhat an tum a nih pawnin ani hi chu player pawimawh a ni chhunzawm zel ang.
Gael Clichy (full-back)
Age: 29; Signed: 2011 (£7m); Appearances: 23; Goals: 1
Player ṭha tak ni 'ṭhin' a ni a, tun season-a a khelh dan enin a vanglai a pel ve ṭan tawh tih a lang. Bench-a ṭhu turte chuan a ṭha mahna. City-in season thara chet ṭhat an duh chuan 'left-back' ṭha zawk an zawn a ngai ang. Clichy hi a 'tackle' erawh a la ṭha hle a, a tackle zawng zawng 81% ah a hlawhtling.
Martin Demichelis (centre-back)
Age: 34; Signed: 2013 (£4.2m); Appearances: 25; Goals: 1
Kum tam tawh lamah City a zawm a, a season ṭan tirah che
ṭha lo mah se a tawnhriat neih ngah chhawr ṭangkaiin Demichelis hi tunah chuan City player pawimawh pawl a ni der tawh. Tun season-a City player zinga ball clear (131) ngah ber a ni a, season khat dang chu City tan a la ṭangkai thei ang.
Aleksandar Kolarov (full-back)
Age: 29; Signed: 2010 (£19m); Appearances: 15; Goals: 0
City-in season tharah insiamṭhat an tum tak tak a nih chuan an player mamawh loh zinga chhiar tel chi a ni. Tun season-ah City tana a ṭangkaina hmuh tur a la vang rih hle.
Vincent Kompany (centre-back)
Age: 29; Signed: 2008 (£6m); Appearances: 23; Goals: 0
Team hruaitu ṭha tak Kompany hi City tlar hnung innghahna a ni a, tun season-ah erawh hliamin a lo tibuai ve reng bawk nen beisei a phak lo hle. Kompany-in a mamawh ber nia lang chu chawlh hahdam rih a ni.
Eliaquim Mangala (centre-back)
Age: 24; Signed: 2014 (£32m); Appearances: 19; Goals: 0
Season ṭan dawnah City-in manto takin Porto aṭangin an lalut a, beisei a la phak lo rih hle. Pound maktaduai 32 man Mangala hi City-in insiamṭhat an tum chuan an chhuah tir mai a fuh zawkin a rinawm a, an leina man zahve pawn hralhna tur erawh an hmu rih kher lo ang.
Bacary Sagna (full-back)
Age: 32; Signed: 2014 (Free); Appearances: 9; Goals: 0
Arsenal defender ṭha ṭhin hian Emirates Stadium-a a khelh angin Etihad lamah a la khel rih lo. A kum a lo upa ve tawh bawk nen a vanglai a pel ṭan mek niin a lang a, game lian thamah erawh tawnhriat ngah tawh a nihna hi chhawr ṭangkai theih a ni. Rinrawl tur chuan a tlak tawh loh hmel a, bench-a ṭhu tur erawh chuan kawl rih a pawi lo ang.
Pablo Zabaleta (full-back)
Age: 30; Signed: 2008 (£6.5m); Appearances: 23; Goals: 1
Argentine right-back hi tun season-ah beisei phak lo mah se City-in season dang an lo hman ṭhat tawh ṭhinahte an player thawhhlawk ber pawl a ni a, season thara chhuah tir mai tur chuan a la uiawm rih ang.
Fernandinho (midfielder)
Age: 29; Signed: 2013 (£30m); Appearances: 27; Goals: 2
Player ṭha tak nia sawi tur ni lo mah se player ṭangkai a ni. Europe club lian lakah beisei angin khel ṭha tawk ṭhin lo nachungin kawl zel erawh a fuh ang.
Fernando (midfielder)
Age: 27; Signed: 2014 (£12m); Appearances: 21; Goals: 2
Season ṭan dawna pound maktaduai 12-a Porto aṭanga City pantu Fernando hian beisei a phak lo hle. A che vel a muangin Manchester khaw club tan a la ṭangkai lo rih hle. Lei duhtu a hmu a nih chuan City hian chhuah se an tisual lo zawk ang.
James Milner (midfielder)
Age: 29; Signed: 2010 (£26m); Appearances: 27; Goals: 3
Player ṭha tak, a phu tawk anga fak hlawh lo pawl tak a ni. Contract thar chungchangah City nen an thu a inhmuh fuh chiah loh avangin a chhuah erawh a rinawm hle. Milner hi tun season Premier League-a City goal khung pakuaah a inrawlh.
Samir Nasri (midfielder)
Age: 27; Signed: 2011 (£24m); Appearances: 22; Goals: 2
A theihna leh thiamna ngaihtuahin Nasri hian tun season-ah City tan a la thawhhlawk rih lo. City-ah hun a hmang tam tawh thawkhat tawh avangin man pangngai taka lei duh an awm chuan City hian chhuah tir an hnialin a rinawm loh. Tun season-ah a tel chunga City an khelhin 59% hnehna an chang thei a, a tel loin 50%-ah chiah hnehna an chang thung.
Jesus Navas (winger)
Age: 29; Signed: 2013 (£14.9m); Appearances: 30; Goals: 0
Sevilla aṭanga City zawmtu Navas hian tun season-ah City player zinga assist ngah ber niin vawi sarih lai a ṭhiante goal thun tur a siamsak tawh. Amaherawhchu vawi 30 khelha goal khat mah la khung loh avangin a record hi a chhuanawm loh.
Yaya Toure (midfielder)
Age: 31; Signed: 2010 (£24m); Appearances: 24; Goals: 8
City-in hlawhtlinna tam tak an chan chhan hi Ivorian midfielder vang hi a ni ti ila kan sawisual lo ang. Player thawkrim leh taima City innghahna a ni a, team chawk phur ṭhintu a ni. Mahse, tun season a khelh dan enin Toure kan hmuh ṭhin kha a ni tawh lo tih a lang a, City-in an mamawh lai ber pawn a che ṭha thei hleithei tawh lo. City tana a thiltih te hi sawi bo rual ni lo mahsela a khelh dan enin season tharah chuan man man taka lei duh an awm a nih chuan chhuah tir mai a pawi tawh lo ang.
David Silva (forward)
Age: 29; Signed: 2010 (£26m); Appearances: 26; Goals: 11
Silva hian tun season-ah vawi 77 goal khungna chance a siam a, hemi kawngah hi chaun City player zingah a record a
ṭha ber. Premier League pumpuiah pawh Eden Hazard leh Cesc Fabregas te chiah a tluk lo a ni. City tan ani chelh hi a finthlak ang.
Sergio Aguero (striker)
Age: 26; Signed: 2011 (£38m); Appearances: 27; Goals: 19
World Class striker City player neih pawimawh ber zinga mi a ni. December thlaa a inhliam chhung khan City-in an mamawhzia a lang chiang. Aguero hian tun season-ah vawi 93 zet goal shot neiin ani aia shot nei ngah Premier League player zingah an awm lo. City tan ani ang player hi chu chhuah chi a ni lo, thlaktu tur an vang dawn lutuk.
Wilfried Bony (striker)
Age: 26; Signed: 2015 (£28m); Appearances: 5; Goals: 1
City-in champion ngei an tum avangin an squad tichhah turin an lalut a, a club tharah a insiamṭhat chhoh lai takin a inhliam. Premier League-ah a ṭhat zia Swansea City tana a khelh lai a kan hmuh tawh avang leh thlasik transfer laia lakluh chauh a nih vangin City-ah a cham rih ang.
Edin Dzeko (striker)
Age: 29; Signed: 2011 (£27m); Appearances: 21; Goals: 4
Bosnian striker hi player ṭha pangngai tak ni mah se City-ah hmun lailum a chang ngai lo. Tun season-a goal li chiah a la khung dan aṭang hian a khelh chhiat dan chu kan hrethiamin a rinawm. Season thum a lo hman tawha goal 16, 14 leh 14 khungtu hi Manchester City-a a hun a tawp tawh niin a lang.
Stevan Jovetic (striker)
Age: 25; Signed: 2013 (£22m); Appearances: 17; Goals: 5
Montenegrin striker hi a chhe lo. Mahse, City-ah beisei a phak lo a, a thiamna tak tak angin a khel chhuak hleithei lo. Bony an lak luh hnuah Champions League squad-ah telh a ni lo, City-ah a awm rei a rinawm loh.
Manuel Pellegrini (manager)
A season hmasa berah Premier League leh League Cup title a naute chawi pui mah se tunhnaia an result vangin sawisel a hlawh nasa a, a dinhmun a nghet lo. Media lam chuan Pellegrini thlakna tur hi an inrinsiak der tawh.