Porto mikhual tur Bayern Munich
Zanin zanlai dar 12:15 hian Portuguese club hlun leh ṭha hmachhawn turin German champion Bayern Munich an zin chhuak dawn.
1987 final rematch
Team pahnih te hi kum 1987 daih tawh khan Prater Stadium, Vienna-ah an lo intum tawh a, hetah hian Porto hi 2-1 a chakin an champion a ni. Hetih hunlai hi chuan European Cup tia sawi a la ni. Kum 1992 aṭang khan a hming thlakin tun thlengin Champions League tih a ni.
Hamanlai chuan
European competition-ah bik team pahnihte hi vawi thum an inhmachhawn tawh a, German club hi vawi hnih chak tawhin Portugal club hi vawi khat an chak tawh thung a ni. Tun hmain Bayern hi Portugal ramah an la tlawm ngai lo a, mah se kum 1987 khan Porto hian final-ah an lo hneh tawh thung.
Tunhnai dinhmun
Porto hian last 16-ah khan FC Basel chu 5-1 in an sawp a, Bayern hian quarterfinal thleng turin FC Shakhtar Donetsk chu 7-0 in an sawp ve bawk. Bayern hian khualmualah goal khung lo mah se an khelmuahah goal sarih ngawt an khung thei a ni. Team pahnih hian goal thun an harsat lo tih an lantir chiang hle a, zaninah pawh hian goal kan hmu ngeiin a rinawm.
Kum 2003/04 season a Jose Mourinho enkawlna hnuaia an champion hnuah Porto hi an thleng sang leh tawh ngai lo a, semifinal an thleng leh tawh lo. Kum ruk hnuah quarterfinal an in pet tling ve leh chauh a ni.
Hetihlai hian an khingpui tur Bayern erawh tun hnaiah record nei ṭha ber pawl a ni thung. Bayern hian Champions League nomawi hi ṭum nga an chawi tawh a, tunhnai kum thum chhungin semifinal an thleng vek a, kuminah hian a vawi li nan thlen leh an tum mek a ni.
Inhliam
Bayern hian inhliam vangin an player pawimawh David Alaba, Frank Ribery, Arjen Robben leh Bastian Schweinsteiger te an chhawr thei dawn lo. Porto lam pawhin inhliam vangin harsatna an tawk ve tho a, forward pahnih Cristian Tello leh Jackson Martinez te an chhawr thei lo ang.
Manager pahnihte
Porto manager Julen Lopetegui leh Bayern manager Pep Guardiola te hi tunhma aṭanga in hrechiang tawn tawh an ni a, kum 1994 aṭanga 1997 chhung khan FC Barcelona tan an lo khelh dun tawh bakah Spain tan 1994 FIFA World Cup squad-ah an lo awm dun tawh bawk.
Club enkawl lamah chuan Lopetegui hian hunhma ala nei lian lo zawk hle a, Spain age level kum li chhung a kaihhruai hnuah Porto hi a pan a, tunah dinhmun ṭha takah a dinpui mek. Hetih lai hian Guardiola erawh khawvel a manager hlawhtling berte zinga mi a ni thung. Barcelona chu inelna zawng zawngah a champion pui vek hnuah Germany a pan a, hetah pawh hian a hlawhtling zui zel rih a ni.
Eng nge an sawi?
Quarterfinal a inkhel tur an pawh zawh hlim khan Porto hi team ṭha tak an ni tiin a lo sawi tawh a, tunah an inkhel tur thlirin Guardiola chuan, "Round hmasa lamah khan Porto inkhel hi kan lo en tawh a, team ṭha tak an nih zia an lantir tawh. An khelmuala khel tur kan nih avangin kan fimkhur a ṭul hle ang, inhliam vangin player ṭhen khat khel thei lo mah se midang tan hun ṭha a ni ve thung. Goal thun ngei tumin kan bei ang," tiin a sawi.
Porto manager Lopetegui chuan, "Football hi chhiarkawp dan hmanga chak zawk zawn a nih ngai loh avangin ball chang tam leh inkhel thununtu ringawt hi chak tihna a ni lo. Hnehna chang tur chuan kan khingpui te chak lohna lai kan hriat a chutah tak chuan kan beih thiam a pawimawh a ni," tiin ball chuh buan buan an tum loh thu a sawi.