Pastore hi khawvel player ṭha ber a ni - Eric Cantona

Kum sarih chhung Cristiano Ronaldo leh Lionel Messi te'n FIFA Ballon d'Or-ah ro an rel a, amaherawhchu Manchester United legend Eric Cantona chuan Paris Saint-Ger­main playmaker Javier Pastore chu khawvel player ṭha berah a chhuah.

United captain hlui Cantona chuan, "Ka tan cuan Javier Pastore hi khawvel player ṭha ber a ni. A inkhel en tur ringawt hian PSG inkhel lai hi vawi hnih lai stadium-ah ka en a, a danglam bik a ni. Football-ah chuan thil thleng thei a tam a, Pastore hi chuan a barakhaih thei reng ang che. Goal ropui chu a khung kher lo ang, mahse pass ṭha bik chu a ngah a ni. A khelh dan hi hmuh nuam ka tih chi a ni," tiin Argentine midfielder chu a fak hle.

Cantona chuan Spain-in 2010 World Cup an champion chhan kha Catalonia vang niin a sawi bawk. United legend chuan, "World Cup champion kha Catalonia an ni. Spain khan Barcelona player 10 hmangin nomawi an chawi a ni. Spain an champion lo a, Catalonia an champion a ni. Spain hi an tla chhe reng lo ang, an rawn tho leh dawn," tiin a sawi.