Ka thlen chin hi ropui ka ti - Ramsey

Arsenal midfielder Aaron Ramsey chuan a club tan Premier League match 150 a khel tling thei chu ropui a tih thu a sawi.

Inrinni zana Burnley nen an inkhelh ṭum khan Ramsey hian Arsenal tana Premier League match 150-na a khel a, a khel chhe lo. Inkhel ṭan aṭanga minute 11-na lehah goal a khung a, a team te a chak pui a ni. Tun season-ah Ramsey hian goal riat a khung tawh.

Arsenal hi a zawnin match riat an chak tawh a, Premier League-ah Manchester United chungah awmin pahnihna an ni mek. Match 32 khelh tawh aṭangin point 66 an hlawhchhuak tawh a, hmahruaitu Chelsea nen point sarihin an inthlau mek.

Wales midfielder Ramsey chuan, "Burnley kan hnehna goal ka khung kha ka lawm em em a, ka lawmna tizualtu chu Arsenal tan Premier League match vawi 150 ka khel tling thei kha a ni." an ti.

Kum 24-a upa Ram­sey chuan, "Ka kum a la tam loh bakah inhliam vangin inkhelh theih loh chang ka ngah hle a, hun harsa tak paltlang chunga hetiang dinhmun ka thleng ve mai hi ka lawm a, ka tan chuan a ropui a ni," tiin a sawi.