Kum ruk mi Aston Villa manager hna diltu chu

Tun season-ah Aston Villa an che chhia a, coach atan Tim Sherwood-a'n rawih hma phei kha chuan an dinhmun a duhawm loh hle. Villa hian an chet chhiat vangin an coach Paul Lambert an ban a, coach thar an rawih hma khan Villa fan ruhkawl kum ruk mi lek Charlie Pye tih hming pu chuan Aston Villa manager hna dilna lehkha chu club CEO Tom Fox hnenah a lo thehlut reng!

Tim Sherwood chuan tunhnai khan he lehkha hi chhang letin Villa manager anga a hlawhtlin loh palh tak hlauha ennnawn theih turin hna dilna lekha hi file-ah dah ṭhat a nih tur thu naupang hnenah hian a hrilh.

Royal Leamington Spa khawpui naupang Charlie hian Villa manager hna a dilnaah lehkhaah chuan ti hian a ziak a, "Team hmaah thusawi tur ṭha tak tak neia ka inhriat mai bakah ka tactic te hi kan hlawkpui ka ring tlat a ni. Goal kan lama lut tur hi dan dan kan ngaihtuah a ngai a, target zawna ball vawi tam zawk kan pet a ngai bawk. Chu chu hnehna chang turin a pawimawh ber a, ka pa pawhin a sawi dan a ni," a ti.

Aston Villa manager-a rawih a nih hlauh chuan hlawh atana a phut pawh hi a tam lo khawp mai. Charlie chuan, "Ka hna dil hi min pe a nih hlauh chuan ka hlawh phut chu : player-te hming sign chuang ngei Villa jersey leh football bakah WWE wrestler toys leh sweet tlem a zawng ka duh dawn a ni. Kar tin hnehna kan chang apiangin bonus-ah 'Twix' chocolate dawn ziah ka duh bawk ang," a ti.

He naupang lawmawm tak mai hian a nu leh pa pawh a hre reng a, "Manager-ah min ruai a nih chuan ka nu leh pa te assistant manager-ah rawih ka duh dawn a, nitin training ground-ah motor in min thlah theih phah dawn a ni. Ka nu hian sandwich siam a thiam em em bawk a, player te tan a lo siamsak thei ṭhin dawn a ni," a ti!

Kum ruk mi lek Pye hian a la duhtawk mai lo, "Manager ka nihna anga ka hlawhtling ta viau a nih chuan kan school min biak sak turin ka beisei dawn che u a ni. Hna ka neih tawh vanga school ka chawlhsan tur thu in hrilh a ngai dawn a ni," a ti bawk.

Aston Villa manager Tim Sherwood chuan mipa naupang kum ruk mi lek inrintawkna hian a ti lawm hle a, Villa manager hna chu Aston Villa CEO Tom Fox chuan a pek ṭep thu Charlie hnenah hian a hrilh a ni.

Tottenham Hotspurs manager hlui Sherwood chuan, "Villa manager hna i hmuh loh vang hian i hnual lutuk lo turah ka ngai a, Villa thuneitute chuan kei ai khan an rawih hman ṭep che tih thu min hrilh a ni. Kan chief executive Tom Fox chuan i hna dilna lehkha hi ka hlawhtlin loh palh tak hlauha ennawn tura dah ṭhat turin i phalna a dil a ni. Mahse, hlawhtin ngei erawh ka duh hle a ni," tiin mipa naupang hnenah hian lehkha a thawn let a ni.

Sherwood-a lehkhathawn a dawn avang hian Charlie chu a lawm hle a, "Manager hnen aṭanga lehkha dawn hi ka inbeisei miah lo, he lehkhathawn vang hian ka hlim em em mai a ni. Manager ni tura Sherwood rawih a nih khan a tumna leh theihna sang tak vangin ka lo lawm em em a, tunah chuan ka lawm lehzual tawh a ni. Villa-ah hian hna ropui tak a thawh theih ka beisei a, tunah pawh hian a thawk ṭan reng tawh a ni," a ti.