Bianchi a la ṭha thei rih lo

Nikum Japanese Grand Prix a chesual Formula 1 driver Jules Bianchi chu a dinhmun ala ṭhat theih loh thu a pa'n a sawi.

Kum 25-a upa Bian­chi hian hma a sawn chak lo hle a, a accident aṭanga thla ruk liam hnu pawh hian nikhua ala hre mumal thei lo a ni. Tunah hian anmahni chenna hmun Nice, France-ah neurosurgeons-in a enkawl mek a ni. Nikum Japanise Grand Prix kha ruah sur vangin a buai deuh a, Bianchi hi a vanduaiah ṭangin a accident phah a, a luah hliam na tak a tuar a ni.

Jules Bianchi-a pa Philippe Bianchi chuan, "Damdawi lam thiamna aṭanga thlir chuan a dinhmun hi a ngei reng rih a ni. Nikuma a accident ni aṭang khan kan chhungkaw tan lung­ngaihna a ni tawh. Hetiang natna hi thih nghal ai pawhin a nep bik lo ang, nitin hian rilru a na thar ṭhin," tiin a sawi.

Baichi chuan sawi chhunzawmin, "Tunhma kha chuan insawizawiin nitin exercise a la ṭhin, mahse tunah erawh chuan nikhua pawh a hre thei tawh lo. A ṭhat leh nan chuan thil mak a lo thlen a ngai tawh ang, a lo harhchhuah leh ngei kan beiseia kan nghak­hlel hle," tiin a fapa chungchanga sawi.