Liverpool in Champions League an hnaih zel
Thawhṭanni zanlaiah Premier League inkhel a awm a, Liverpool in an mikhual Newcastle United 2-0 in a hneh. Reds in a zawna Premier League match hniha chak hmel an hmuh loh hnuin an tho ve leh ta a, Manchester City an chak lo bawk nen Champions League khelh phak an sawi ri ngam ve leh ta.
Anfield-a inkhelah hian inkhelh hma in Hillsborough chhiatna thlen champha kum 26 na pualin ngawi renga minute khat din a ni. Livepool tan English rawlthar duhawm Raheem Sterling leh Joe Allen te'n goal an khung a, Newcastle in an chhanlet theih loh avangin khualmualah a tlawm zawka an ṭan a ngai ta a ni.
Inkhel chu
Liverpool tan captain Steven Gerrard leh Martin Skrtel te hrem vangin an la khel thei lo a, Emre Can erawh a inlan thei tawh thung. Sakho leh striker Daniel Sturridge te chu hliam vangin chhawr theih an ni lo bawk.
Inkhel ṭan tirh aṭangin Liverpool an hmuhnawm nghal a, goal pawh an khung hma hle. Tunhnaia contract thar a sign duh loh vanga boruak nei ve reng Raheem Sterling chuan Europe club lian ho in an rim chhan rawn tilangin Jordan Henderson ball siam ṭha tak chu Gabriel Obertan a bum zet hnuah mawi takin a pet goal a, Liverpool in minute 9-ah 1-0 in hma an hruai der.
Newcastle United in minute 30 naah sutna chance ṭha an nei a, mahse Mehdi Abeid ball pet chu Liverpool keeper Simon Mignolet tan dan harsa a ni lo. First half tawp nan minute tlemte chauh a awm tawh tihin Yoze Perez chu penalty box chhungah Dejan Loveren chuan a ti tlu a, mahse referee in penalty a ham lo. Goal dang lut tawh lo in chawlhlawk an hmang a, half-time-a Liverpool hmahruaina chu 1-0 a ni.
Liverpool in first half thunun mah se second-half bul ṭan ṭha zawk erawh goal phur zawk Newcastle United an ni. Mahse, Magpies lamin an chance neih chhun an chhawr ṭangkai theih ṭhin loh avangin Liverpool bawkin goal an thun leh ta nge nge a, Welsh midfielder Joe Allen chuan Mike Williamson defending chhiat zarah goal rawn khungin inkhel tawp thlengin goal dang a lut tawh lo a, Liverpool 2-0 in an chak ta a ni.
Inkhel behbawm
Joe Allen-a'n goal a khung chiah khan Liverpool player tun season-a goal khung thei 18 na a ni a, club record ding tawh lai season khata player hrang hrang in goal an khung hnem ber record chu an rawn nihrual ta chiah a ni. Nikum a Liverpool in goal an khung dan nen a khaikhin erawh chuan Liverpool hian goal an la khung tlem hle mai a, season hmasa tun ang zat Premier League game-ah hi chuan goal 88 an khung a, tun season-ah erawh goal 47 chiah an la khung thung.
Anfield-a chak result avang hian Liverpool chu table-ah panga naah an lawn chho ta a, khelh 32-ah point 57 hmu in an chung chiaha awm Manchester City an phak lohna hi khelh zat in angah point li chiah a ni tawh a ni. Premier League-ah match ruk chiah khelh tur a awm tawh a, Liverpool tan Champions League khel phak tur chuan chak chhoh zel bakah City chet chhiat chan a ngai.
Newcastle tan erawh match nga chhung zet chu a zawna an tlawmna a ni ta a, chanchin duhawm lo dang an neih chu an player pawimawh Moussa Sissoko-a'n yellow card vawihnih na minute 83-a a hmuh vanga hnawhchhuah a ngai kha a ni bawk. Hun rei tak chhung cancer vanga dam lo tawh Jonas Gutierrez chu minute 67 naah rawn tlan lutin Liverpool fan-te'n ding chungin an lo lawm a ni.
Eng nge an sawi?
Liverpool manager Brendan Rodgers chuan, "Attacking game hmuhnawm tak kan khel a, lehlam pawl in ball an chanin kan chhuhsak zung zung thei a, first half zawh hma minute nga vel thleng kha chu game kha kan thuhnuaia awm a ni. Penalty kan chawi loh avangin kan vannei a, Philippe Coutinho khan a khel ṭha takzet bawk. Khawvela league ṭha bera player ṭha ber pawl a nih chhan a rawn tilang in ka hria," tiin a player khel ṭha chu a fak.
Newcastle manager John Carver chuan, "Penalty ni ngei tura ngaih pek kan ni lo a, kha kha kan tuar a ni. Brendan pawn penalty a ni tih a pawm a, referee Mike Riley pawh kha naktukah phone ila, penalty ngei a ni tiin min chhang ang. Mahse, awmzia a nei tawh lo a, a pawimawh ber chu kan game hmabak paruk a ni a, cup final paruk khel tur angah kan inngai tur a ni," a ti.