Rodgers-a'n Sterling titi pui a tum

Tunhnaia Liverpool tan contract thar a ziah duh loh vanga boruak nei lian tak Raheem Sterling chuan a ṭha lo zawngin chanchinthar a nei a, chu chu British chanchinbu ṭhenkhatin 'Shisha pipe' (ruihhlo zukna) a fawp lai thlalak Pathianni chhuak chanchinbuah te an tarlan hlawm vang a ni.

Inrinni zana Newcastle United laka goal khungtu Sterling a thlalak tihchhuah a nih hnu hian ruihhlo a khawih ve ngei nia rinhlelhna a lian hle. Mahse, Liverpool lama a boss Brendan Rodgers chuan a nau chuam hi chhan tlatin a titi pui tur thu a sawi.

Liverpool manager Brendan Rodgers chuan, "Sterling hi ka titi pui ang. Kei chuan hetiang thil a tih leh tih loh ka hre lo a, ka hriat chin chu thlalak ka hmuh chauh kha a ni. Thutlukna ka siam hma in amah ka biak phawt hi ka tih tur a ni," a ti.

Player te enkawlna kawnga khauh ve tak Rodgers chuan, "Ka ngaihdan chuan professional player kan nih chuan ruihhlo tih vel hi chuan min khawih buai tur a ni lo hrim hrim. Ruihhlo hi chu ngaihzam theih dan a awm lo hrim hrim. Heti lai hmuna kan player duh te pawh professional tak a an nun vawng thei tur chauh te an ni. Chutiang mi chu Sterling hi a ni bawk. Football-ah hian a rilru zawng zawng a pe a, player a nihna ang pawn hma a sawn hle reng a ni. Tunhma a ka lo sawi tawh ṭhin ang khan player naupang tak nih lai chuan tihsual kan nei fo ṭhin a, a pawimawh ber erawh kan tihsual aṭanga in zir chunga insiam ṭhat hi a ni," a ti.

Sterling talbuai laiin Liverpool in chanchin lawmawm hriat tur an nei thung a, tun season inhliam vanga buai reng renga hun hmang Daniel Sturridge chu hliam vanga Newcastle a hmachhawn theih loh hnuah Pathiannia Liverpool FA Cup semi-final khelh turah a dam hman beisei a ni.

Liverpool hian coach thar Tim Sherwood hnuaia harhtharna chang mek Aston Villa chu FA Cup semi final Wembley Stadium-ah Pathianni zan dar 7:30 khian an khelhpui dawn a ni.