Kum dang aiin kumin hi a ngaihnawm ang - Marquez

World Champion Repsol Honda rider Marc Marquez chuan kumdang zawng aiin kumin MotoGP inum boruak chu a sangin a ngaihnawm a rin thu a sawi.

Kumina intlansiak hmasa berah che ṭha lo mah se, Texas-ah a insiam ṭha nghalin pakhatna a ni leh tawh a, tunkar tawp Argentina Grand Prix an tlan tur hian ngaihven a hlawh leh hle ang. Yamaha rider Valentino Rossi leh Ducati rider Andrea Dovizioso te hi tawnhriat ngah leh champion thei tur khawpa ṭha an nih avangin an inel hle tura ngaih a ni.

Kum 22-a upa Marquez chuan, "Texas-ah ṭha takin ka tlan theih avngin ka hlim a, tunkar chu nuam ti takin hun ka hman theih phah a ni. Tunah hian Argentina Grand Prix atan kan inbuatsaih leh ṭan tawh a, kan chet ṭhatna hi kan chhawm nun zel theih ka duh a, ka bei­sei bawk a ni. Rider ṭha tak tak an tam avangin kumin chu a harsa dawn a, kum tluanin a ngaihnawm hle ang," tiin a sawi.