Arsenal lakah Tottenham an tlawm

Premier League champion tum ngam Arsenal chuan tun season atana fiahna hautak hmasa ber an paltlang. Gunners hian Gabriel Magalhaes-a goal khat tauh luh hmangin Tottenham Hotspur chu 1-0 in an hneh.

Mikel Arteta naute hian EPL match li aṭanga point 10 hmuin table-ah pahnihna an ni a, an chungah hian Manchester City chu point 12 nen an awm - Pep Guardiola naute hi an la chak kim avangin um phak erawh an awlsam dawn lo.

Fiahna chu

Arsenal hian hrem vangin Declan Rice an chhawr thei lo a, captain Martin Odegaard a hliam bawk - Thomas Partey leh Jorginho ten midfield lai an awp a, a hma lamah Kai Havertz, Leandro Trossard, Bukayo Saka leh Gabriel Martinelli te an awm thung.

Ange Postecoglou-a nauten an tih ṭhin dang pangngaiin na takin goal an nawr. Dejan Kulusevski a hlauhawm a, a goal khung tur hlauhawm tak chu ṭum hnih ngawt mai Arsenal keeper David Raya-a'n a lo dansak hram.

Spurs striker Dominic Solanke-a ball tauh hlauhawm tak chu Raya-a'n zuan phak tawh lo mah se goal ban hrulah a kal liam a, forward Brennan Johnson-a'n buai nuaih kara a hlap hlauhawm tak pawh goal bar chungah a thlawk liam.

Gunners goal hlauhawm hmasa chu Kai Havertz-a ball tauh a ni, keeper Guglielmo Vicario chuan a lo dansak - ani hian Martinelli khung tur pawh a dang, Brazilian forward khan Saka pe zawk ni se la a hlauhawm zualin a rinawm.

Goal khat

Rice leh Odegaard awm loh a hriat a, ball inpek sual leh hloh a awm leh zauh ṭhin - Spurs goal bul hnaiah hlauhawm taka ball inpek an harsat bawk, an khingpui ball hloh changa lo vuak let chu Arteta naute hnathawh ber a ni.

Minute 64-na a ni a, Arsenal lamin corner an hmu. A pet turin Saka chu muangchangin a kal chho a, stadium chhunga Arsenal fans awmkhawmna lam aṭangin a pet dawn, fans ho chu goal lawm turin an inbuatsaih nghal a ni ber - an lo sahawk nghal ringawt.

English forward ball pet hi box chhunga awm Gabriel chuan chiang zetin a tauh lut. Brazilian defender hi amah vengtuin a ngaihsak tawk lo a, a ball tauh hi a ran em avangin lai deuh a kal ni mah se Vicairo tan dan theih a ni lo.

Postecoglou naute hian season hmasa khan, penalty chhiar tel loin set piece aṭangin goal 16 an chhuah, hei hi Arsenal hlauhawmna a ni ve thung, kuminah pawh North London team pahnih daidangtu a ni leh ta chiah bawk.

Muhil thei lo!

Mikel Arteta chuan Tottenham nen an inkhel tur hi a vei hle a, an match hmasa lamah an chetsual zauh bakah a player ṭha hliam an awm avangin muhil hleithei lo khawpa ngaihtuahna a sen thu a sawi.

Arsenal manager Arteta chuan, "Tottenham hmachhawn tur bik hian ni nga chhung kan inbuatsaih. Player ṭhenkhat an khelh theih loh avangin kan khelh dan phung ṭhenkhat pawh kan tih danglam a ngaih phah ve bawk.

"Khelmuala lut player-ten ka duh angin an khel thei, inkhel hmuhnawm bik chhawp chhuak kher lo mah ila hnehna kan chan danah ka lawm," a ti a, a player te chu hnehna chan châka an tuihal nasat thu a sawi bawk a ni.

Gunners hian Ningani zanah Champions League group match khel turin Atalanta an lenchilh dawn a, kar tawpah EPL champion Man City hmachhawn turin Etihad Stadium an pan zui leh nghal ang - hmabak a hautak dawn hle.

Harh ngai Spurs

Tottenham Hotspur hian tun season EPL match hmasa pali aṭangin point li chiah an hmu a, an insiamṭha vat a nih loh chuan a sang zual pali zinga tel phak pawh an tan thil harsa a ni dawn tih a chiang.

Spurs manager Ange Postecoglou chuan, "Ka hringnunah hian ka hlawhtling nghal thut lem lo, football huangah pawh ka kum hnih hun hmannaah ka hlawhtling ṭhin," a ti. Season hmasa khan North London hi a enkawl tawh, kumin hi a kum hnihna a ni.

North London club hian 2008 League Cup an lak hnuah eng inelnaah mah an la champion leh lo. League Cup hi kum zabi 21-na china an title neih awmchhun a ni hial, Australian manager hian thawnthu ziah danglam theih erawh a la inbeisei thung.

Kum 59 mi Postecoglou hian tun hmain South Melbourne, Brisbane Roar leh Japanese club Yokohama F Marinos te chu kum hnih a enkawlnaah a lo hlawhtlinpui tawh a, Australia pawh a kum hnihnaah tho Asian Cup a lakpui bawk.

Ngaihnawm

• Arsenal hian khualmualah Premier League match vawi ruk chu a zawnin hnehna an chang ta, tun hmain Arsene Wenger hunlai khan vawi riat chak zawn an lo nei tawh - record hmasa an hnaih tawh hle.

• North London Derby bikah Gunners hi a zawnin khualmaulah vawi thum an chak ta, kum 1988 hnuah hetiang thil an tih leh theihna hmasa a ni hial.

• Spurs hian tun season EPL-ah point li chiah an la hmu (W1 D1 L2). Kum 2025-26 season hnuah bul an ṭah chhiat ber ṭum a ni a, hemi season hian point thum chauh an hmu thung.

• Mikel Arteta-a'n a enkawl chinah Arsenal hian Tottenham khelmual hi vawi ruk an tlawh tawh a, chung zinga pathumah chuan an chak. Arsene Wenger khan vawi 22 a tlawhah ṭum li hnehna a chang.