Champions League-in VVD lung a len

Liverpool defender Virgil van Dijk chuan Champions League-a an kir leh thei ta chu a lawm thu sawiin, "Ka ngai hman hle a ni," a ti - season hmasa khan Liverpool hi Europa League-ah an inlan a, quarterfinal-ah Atalanta hneh loin an tla.

Tun season-ah Champions League khel turin Liverpool an lo kir leh ta a, defender Virgil van Dijk a phur hle - zanin dar 12:30 hian AC Milan chu khualmualah an lenchilh dawn a, chak an beisei ang.

VVD chuan, "Champions League rimawi ngaihthlak a, ka player puite nena khelmuala chhuah ka châk tawh takzet. Liverpool ang club hi chu Champions League khel tur kan ni," a ti.

Mahse, Liverpool hian an league match hmasa pathuma hnehna an chan hnuin, Inrinni zan khan club tenau Nottingham Forest chu rin loh takin 1-0 in an ngam lo a, AC Milan an lenchilh zui dawn avangin fan-te an hlauthawng.

VVD chuan, "Champions League-ah kan kir leh ta a, Forest laka kan khelh ang mai maia khelh erawh a fuh lo ang. Chuti a nih loh chuan kan talbuai leh dawn. Inkhelh ka châk tawh a, kan fans min zuituten thawm ring tak nen min thlawp ka beisei," a ti a, San Siro-ah Liverpool chu hnehna chanpui ngei a tum.

Liverpool hian Jurgen Klopp-a hnuaiah Champions League nomawi pakhat chawiin, final vawi hnih dang an lut bawk a, Arne Slot-a hnuaiah enge an an dawn, hriat a châkawm hle - Dutch coach hoa European football-a an match hmasa ber tur a ni.