Khelh dan phung thar Champions League hun a inher chhuak: Record nei ṭha Real Madrid inlan nghal dawn

Real Madrid-in zanin dar 12:30 hian Santiago Bernabeu-ah VfB Stuttgart an mikhual dawn a, Champions League-a record nei ṭha ber Spanish club lianin fiahna an hmachhawn nghal dawn.

Los Blancos-in vawi 15 nomawi an chawi tawh a, inelna hnuhnung 11-ah vawi ruk an champion. Tun season-ah Carlo Ancelotti hoten Kylian Mbappe an lalut a, UCL nomawi chawi leh ngei an tum ruh hle.

Season liam ta khan Real Madrid hian UCL champion turin German club lian pahnih Bayern Munich leh Borussia Dortmund te chu semifinal leh final-ah an hneh a, kumina an bul ṭanna tur pawh German club Stuttgart an ni.

German club hi...

Stuttgart hi season liam ta khan Bundesliga-ah pahnihna an ni a, Bayern Munich chungah an awm. Club top scorer Serhou Guirassy chuan league-ah goal 28 a khung a, mahse an goal khung khawl Guirassy leh defender pawimawh Waldemar Anton hi an elpui Dortmund lakah an chan.

German club hian inthuam ṭhat nan Brighton aṭangin Deniz Undav an la nghet a, Augsburg aṭangin Ermedin Demirovic la bawk mah se season liam ta an la tluk pha lo. Sebastian Hoeness hote hian Bundesliga match thum an khelh tawhah chak, draw leh chak lo an nei vek tawh a, Santiago Bernabeu-a Real Madrid hneh tur chuan vanneih tel a ṭul ang.

Mbappe hun...

Real Madrid player thar Kylian Mbappe hi Cristiano Ronaldo hnung zui thei tura theihna neia ngaih a ni a, France rama nomawi chawi theih zawng zawnga chawi bakah FIFA World Cup nomawi a chawi tawh.

Mahse, Mbappe hian Champions League nomawi a la chawi lo a, hei hi Real Madrid a pan chhan pakhat a ni. French forward hian a mi ngaihsan Ronaldo angin club thar tan bul a ṭan fuh tawk lo a, La Liga-ah a langsar nghal lo.

Mbappe hian Real hi Super Cup nomawi chawipuiin club top scorer ni mek mah se inelna hrang hrang match ruk a khelh tawhah goal li chauh a la khung a, hei aia tam khung tura beisei a ni.

Zanin hian Mbappe leh a ṭhiante hun a inṭan dawn a, French forward tan a awlsam dawn lo a; Brazilian forward Vinicius Junior aia lansarh ringawt pawh hi a harsa ang. Real-in an match hnuhnung berah Real Sociedad 2-0 in an hneh a, Vinicius leh Mbappe hian penalty aṭangin an khung ve ve. Penalty hmasa zawk pettu chu Vini Jr a ni a, Ancelotti hnuaiah Mbappe a la pawimawh ber rih lo.