Yamaha ADFA First Division an ṭan

Aizawl DFA hnuaia inelna sang ber Yamaha ADFA First Division Tournament chu nimin khan RG Stadium-ah khelh ṭan a ni. Match hmasa berah Electric Veng leh College Veng te goal awm loin an inhnehtawk a, inkhel hnuhnung zawkah Ramhlun North-in Bethlehem Vengthlang 3-0 in an sawp.

Bethlehem Vengthlang hi season liam ta khan league round-ah pakhatna an ni a, I Day Football-ah MPL club zingah inelna hmachhawnin season thar atana inbuatsaihna nei ṭha mah se bul an ṭan ṭha lo. Nimin inkhelah hian Laldampuia enkawl Ramhlun North-in Vanlalhruaia goal hnih hmangin BVT 3-0 in an hneh a, season liam taa Chanmari FC enkawltu Dampuia kaihhruai team hi First Division champion rinkai zinga mi an ni.

Vawiin hian RG Stadium-ah inelna chhunzawm a ni dawn a, MPL champion hmasa ber Dinthar FC leh Mission Veng te chhun dar 11:00-ah an inkhel dawn. Chawhnu dar 2:00-ah Kanan FC leh Ramthar Veng te an inkhel zui ang a, team an intluk tlang hlawm hle.

Tun season-ah hian ADFA hnuaia football inelna sang ber hi kalphung thlak hret a ni a, phase 1 leh phase 2-ah an ṭhen. Inelna hmachhawn tur team 10 te chu group hnihah ṭhen an ni.

Group A-ah Bethlehem Vengthlang FC, Aizawl FC, Academy, Ramhlun North FC, Electric Veng FC leh College Veng FC te an awm a, group B-ah Kanan FC, Hlimen FC, Ramthar FC, Mission Veng FC leh Dinthar FC te an awm thung.

Group khat aṭangin team pahnih ve ve, phase 2 khel turin an tling dawn. Phase 2 pawh hi league-a khelh tur a ni. ADFA hnuai inelnaah hian player bakah team official te chu AIFF CRS kaltlanga ziahluh vek an ni a, inelna kaihhruai nan hian CMS hman a ni bawk.