Bayern hmaa ding tur Zagreb

Champions League-ah Bayern Munich-in zanin dar 12:30 hian Dinamo Zagreb an mikhual dawn. Vincent Kompany kaihhruai Bavarians-in Bundesliga-ah bul an ṭan ṭha a, UCL-ah an chet ṭhat chhunzawm an tum ang.

Bayern midfielder Joshua Kimmich chuan, "UCL-ah tum ngai zen zen loh team an awm a, mahse kan dah hniam thiang lo. Team tin hi vanduai theihna vek an ni," tiin a sawi. Bavarians khingpui tur Dinamo Zagreb hian group stage-ah Chelsea leh Arsenal te pawh an barakhaih tawh.

Mahse, Bayern hian UCL-ah bul an ṭan ṭha ṭhin. Inelna hnuhnung 20-a an match hmasa berah tlawm an nei lo a, group match-ah match 40 chhung chak loh an nei tawh lo bawk. Kum 2015 khan Bayern leh Dinamo hi group khatah an awm ho tawh a, khualmualah 2-0 in an chak a, an mualah 5-0 in an chak bawk.

Bavarians hian Kompany hnuaiah an khingpui an la hneh vek a, an match hnuhnung berah phei chuan Holstein Kiel 6-1 in an sawp. Harry Kane-a'n hattrick a siam a, Jamal Musiala-a'n hma a sawn zel - Zagreb tan chelh an harsa ang.