Man United mikhual Barnsley

Zanin aṭangin League Cup third round khelh ṭan a ni dawn a, Manchester United chuan zanin dar 12:30 hian Old Trafford-ah League One club Barnsley an mikhual dawn.

Erik ten Hag-a hoin Man United hian kum 2023 khan League Cup nomawi an chawi a, season liam taah erawh fourth round-ah Newcastle United 4-0 a hneh loin an tla.

Kuminah Man United-in nomawi chawi an duh a nih chuan League Cup an lak thutak a ṭul dawn a, Ten Hag-a'n player a siksawi thiam a ṭul ang. Red Devils hian Inrinni zan khan Southampton chu 3-0 in an hneh a, inrintawkna an ngah chhoh nan League One club laka an chak chian hi a pawimawh.

United defender Matthijs de Ligt chuan, "Man United-ah ka hlim. Player-te hi theihna sang tak tak an ni a, player naupang zawk hmasawn tur leh hmasawn tum te an ni. Kar liam ta angin result ṭha kan neih ka beisei a, team angin hma ka sawn ngei ka ring," tiin a sawi.

Chutihrualin De Ligt hi chawntha tawm vangin Saints an hneh ṭum hian hun tawp dawnah lakchhuah a ni a, Ten Hag-a'n Ajax-a a enkawl tawh defender hi a awltir a nih pawhin thilmak a ni hran lo ang.