Champions League: Zawhna leh Chhanna

1. Team engzat nge tel dawn?

= UCL-ah hian season liam ta khan team 32 an tel a, tun season aṭangin team 36 an tel ang. Team parukin an tam belh.

2. Inelna kalphung thar danglamna?

= Tun hma chuan team 32 hi group pariatah ṭhen darh an ni a, group khat aṭangin a sang pahnihin last 16 an lut. Kuminah erawh group-ah ṭhen a ni tawh lo a, team 36 chuan league table khat an inṭawm dawn.

Team tinin match riat an khel ang a, an khingpuite hi a hran vek an ni dawn. Draw an neih hian, team 36 hi an ṭhat dan a zirin pot paliah team pakua zelin an sem darh. Team tin hian pot tina mi hi pahnih zel an hmachhawn dawn.

Match riat zinga pali hi an mual (home) ah an khel ang a, match li dang hi khualmual (away) ah an khel ang. Draw an neih hian home leh away-a an tum tur hi chinfel nghal vek a ni.

3. Engtin nge league table a awm ang?

= Football inelna kalphung pangngai ang thoin a chak zawkin point thum an hmu ang a, a chak lo zawkin point an hmu dawn lo a, an inhnehtawk chuan point khat ve ve an hmu ang.

Kalphung thar hian chess inelnaa hman ṭhin 'Swiss-system' an hmang a, team te hi intum vek lo mah se table khat an inṭawm. Fixtures vannei deuh an awm thei a, mah se computer hmanga dik taka pawh vek a nih avangin sawisel theih a ni lo. Table-a an dinhmun hi knockout stage luh leh luh loh hriltu tur a ni.

4. Eng zatin nge knockout stage lut dawn?

= Team 36 aṭangin team 24-in knockout stage an lut dawn. League round khelh zawha a sang pariatin last 16 an lut nghal dawn a, knockout stage lut rau rauah last 16 luh nghal hi a pawimawh ang.

Table-a pakuana aṭanga 24 ten last 16 khel turin playoff an khel leh dawn. Playoff hi home leh away-a khelh tur a ni a, pakuana aṭanga 16-na te chu seeded an ni ang a, an mualah second leg an khel ang.

5. Eng zat nge tla dawn?

= Season dangah chuan UCL aṭanga tla team-in Europa League an khel leh thei a, kuminah erawh UCL leh Europa League a inzawm dawn tawh lo. League table-a 25-na leh a hnuai lam zawng chu an tla nghal tawp dawn a ni.

6. Inkhel a tam phah dawn em?

= Team tel zat an tam a, match khelh tur pawh a tam phah dawn. Kum dangah chuan January thlaah European competition en tur a awm ngai lo a nih kha. Tun season-ah erawh January 21-22, 2025-ah matchday 7 khelh chhunzawm a ni ang a, January thla tawpah league round khelh zawh a ni ang.

Last 16 khel tur zawnna playoff chu February 2025-ah khelh a ni ang a, last 16 chu March 2025-ah khelh a ni ang. April thlaah quarterfinal leh semifinal khelh a ni ang a, final hi May 31, 2025 hian Allianz Arena-a khelh tur a ni.