Nuamsain Barca an leng vel e!

Hansi Flick-a hnuaia season duhawm an hman Barcelona-in an chhunzawm zel a, league match nga an khelh tawha an vawi nga chakna ni turin Pathianni zan khan Girona chu 4-1 ngawtin an sawp.

Catalan club tan Lamine Yamal chuan goal hnih khungin, Dani Olmo leh Pedri ten goal khat ve ve an khung bawk a, Cristhian Stuani chuan Girona tan khung ve mah se awmzia a nei phak lo.

Barcelona hian league match nga an khelh tawhah goal 17 zet an khung ta a, an lamah goal li a lut ve bawk - German coach Flick-a enkawlna hnuaiah hma an sawn zel a, champion rim an nam ṭan.

Catalan club hian table chung ber an luah mek a, an hnuaiah Atletico Madrid, Real Madrid leh Villarreal te chuan point 11 vek neiin an dawt - tun season La Liga a ngaihnawm chho viau dawn e.

Naupang Yamal

Barcelona rawlthar duhawm Lamine Yamal-a'n an club legend leh mi tam takin khawvela footballer ropui bera an ngaih Lionel Messi nena khaikhin a duh loh thu a sawi a, Messi-a thlen chin thlen chu thil tihtheih a nih loh thu a sawi.

Mahse, kum 17 mi forward hian Messi thlen ang zahve chauh a thleng a nih pawhin footballer ropuiah chhiar a ni dawn - Messi a fak hnu lawkah goal hnih a khung a, Barca a chakpui.

Euro leh La Liga nomawi nei tawh Yamal hian minute 30-naah goal hmahruai khungin, minute sarih hnuah a belhchhah leh a, khelmual chhunga player naupang ber hnathawh zarah Barca hian 2-0 in hma an hruai.

Yamal-a ṭhatzia pholangtu chu a goal khung pahnihte hi goal ṭha bika chhiar tlak ve ve a ni - tun season-ah match nga khelin goal thum a khung tling ta der a, assist vawi li a nei tawh bawk.

Player tlangnel Olmo

Barcelona-in nipui transfer-ah an academy graduate Dani Olmo an la let a, RB Leipzig attacking midfielder la let tura an sum sen zat hi euro maktaduai 60 a tling hial.

Catalan club hi sum lamah an talbuai bawk si avangin Olmo la lut turin an inṭhuahfai a ngai tel a, midfielder pawimawh Ilkay Gündogan, Julián Araujo, Marc Guiu leh Mikayil Faye te ho an chhuahtir a, Clément Lenglet leh Vitor Roque pawh loan-a chhuahtir an ni.

Catalan club an inseng sual lo - Olmo hian minute 47-naah Barca goal thumna a khung ve leh a, Catalan club tan league match masa pathumah goal a khung vek! Kum 2011-a Cesc Fabregas hnua Barca tana a league match hmasa pathuma goal khung leh thei hmasa ber a ni hial.

Olmo hi minute 63 dana goal khung ziah ang a ni a, a record hi a ropui rem rem hle. Hetihrual hian Olmo hi hliam vanga lakchhuah a ngai a, kar li vel a chawlh a ngai dawn.

Lawm a kim lo

Barca-in goal thum an khung hnuah pawh duhtawk zai an rel lo. Midfielder duhawm Pedri chuan Marc Casado-a ball pek duhthusam chu minute 64-naah a belhchhah ve leh a, 4-0 a ni der.

Mahse, Barca tan lawm a kim lo. Hun tawp nan minute 10 chauh a awm tawh tihah Cristhian Stuani chuan Girona tan a khung ve a, a team kaih harh nan tlai hret tawh mah se, Barca coach Flick-a tana ngaihtuahna sen nawn ṭulna a ni.

Barca hian league match nga an khelh tawhah goal chhuah loh vawi khat chiah an nei a, goal li an khung theihna Girona laka goal khat an chhuah tel hram hian tlarhnung inremphui an mamawhzia a pholang.

Catalan club tan lawm lohna tur dang a awm. Olmo inhliam bakah hun tawp nan minute li chiah a awm tawh tihah Ferran Torres chu Yaser Asprilla laka a foul avangin hnawhchhuah a ni a, minute 17 chiah khelmualah hun a hmang hman.