Red Bull chhaih buai turin Piastri a chak!

Pathianni zana tlan zawh tak Formula 1 Azerbaijan Grand Prix-ah Oscar Piastri a chak ber - Piastri chak hi Red Bull tan chuan ngaimawh tham a tling ta, team championship lamah nghawng na tak a nei.

McLaren driver Piastri a chak ber a, a teammate Lando Norris chu palina niin champion lai Max Verstappen chu pangana a ni thung. Team championship lamah McLaren hian point 476 hmuin Red Bull (456) pelin hma an hruai ta.

Red Bull driver pakhat zawk Sergio Perez chu a tlan tluan ve thei lo, intlansiak tawp dawn lap hnih chauh a awm tawh tihah Ferrari driver Carlos Sainz nen pathumna nih an inchuh a, intipalhin safety car a luh a ngaih phah hial.

Kum 23 mi Piastri chuan, "Ka hnung chiaha awm Charles Leclerc khan min nawr na em em a, ka tan chuan intlansiak hautak tak a ni, chutihrualin F1 huanga ka chet fuh ber ṭum a ni thung," tiin a sawi.

Tun hnaia che ṭha thei tak Lando Norris a hmunawm lehpek hle, 15-na aṭang daihin bul ṭan mah se lap 49-na an tlan meuh chuan Verstappen a tlan pel a, palina a nih bakah 'fastest lap' a neih avangin point a hmuh belh.

Driver championship lamah, world champion a zawna vawi thum ni lai Verstappen chuan hma la hruai tho mah se, amah hnaih bertu Norris chuan an inkar point 62 chu point 59-ah a rawn tizim hret.

Tun season atan intlansiak hmabak pasarih an la nei, champion tuma inelna boruak a sang dawn hle. Kum tir lamah Red Bull leh Verstappen kal fawr viau mah se, tun hnaiah McLaren rawn tho chhuakin an chhaih buai phak.

World champion vawi sarih ni tawh Lewis Hamilton tan erawh hun ṭha a ni hran lo. Mercedes driver hi pakuanaah a thleng a, season thara Ferrari car khalh tur hian tun hma lama a boruak ang kha a nei phak ta rih lo.

Khawvela car intlansiakna sang ber Formula 1 hi September 22, Pathianni hian an tlan chhunzawm leh dawn. Asia khawmualpuia tlankawng hmingthang Marina Bay Street Circuit-ah Singapore Grand Prix an tlan dawn a ni.