A chung berah Conte-a enkawl Napoli

Antonio Conte a nih tawh hi chuan boruak a danglam ṭhin - season hmasa lama talbuai tak mai Napoli chu Serie A hmahruaitu a nihpui leh ta der mai.

Pathianni zan Serie A inkhelah Napoli hian Cagliari chu 4-0 in an sawp, tun season league match vawi li an khelh tawh aṭanga point kua hmuin Italian football inelna sang berah hian dinhmun chungnung an luah.

Inkhel dangah champion lai Inter Milan erawh an chak zo lo. Simone Inzaghi naute hi Monza nen 1-1 in an inhnehtawk a, point hnih an hloh avangin hmahruaitu an nihna chu an hloh rih a ngai ta a ni.

Conte enkawl Naples club hi an match hmasaah duhthusamin an khel nghal bik lo, a hnuah erawh an insiamṭha ta hle. Cagliari lakah hian Giovanni Di Lorenzo, Khvicha Kvaratskhelia, Romelu Lukaku leh Alessandro Buongiorno ten goal khat ṭheuh an khung.

Italian manager Conte chuan, "Nipui bazar a zo fel chauh a, kan team hian kan nih dan tur anga khelh kan la zir mek chauh a ni. Tun hnai thla hnih leh a chanve chhunga kan hnathawh leh hmasawnna erawh lawmna tur hlir a ni," a ti.

Naples club hian Serie A nomawi an chawi hnuah an che buai zui a, an chet ṭhat loh avangin manager pawh an inthlak. Conte an la lut a, manager tawnhriat nei ṭha hian ropuina rama hruai kai leh a tum ang.

Napoli tlan pel turin Inter Milan tan chak ngei a ngai a, mahse Monza tana Dany Mota goal khung chu hun tawp dawnah Denzel Dumfries hmangin an sut hram a, point khat hlawh chhuakin pahnihnaah an awm a ngai ta zawk.

Inzaghi naute hi tun season atan chuan Serie A team zingah tlawm la nei lo awmchhun an ni a, vawi hnih chu an khingpuite nen vawi hnih an inhnehtawk thung, point li an paih tawh tihna a ni.