Punjab-in Blasters an hneh

Pathianni zan Indian Super League inkhelah Punjab FC chuan 2-1 in Kerala Blasters an hneh a, chakin bul an ṭan - he inkhela goal lut hi minute 80 hnu lama lut vek a ni!

Punjab hian minute 86-naah Luka Majcen-a penalty hmangin goal hmahruai an khung a, an chakpui mai tura ngaih a nih laiin hun pek belh minute hnihnaah Jesús Jiménez chuan Blasters tan si phurh a sut.

Mahse, hetah hian a la tawp lo - hun pek belh minute nganaah Filip Mrzljak chuan Punjab tan a khung ve leh a, South Indian club ṭantute au thawm a reh nghal chiang hle.

Season hmasaa I League champion vanga ISL khel Punjab FC-in chak chungin season bul an ṭan a, coach thar Panagiotis Dilberis hnuaiah beiseina an nei sang ang.

Blasters tan hian midfielder Freddy Lallawmawma chuan inkhel bul a ṭan a, Punjab FC erawh ISL-a Mizoram player nei lo awmchhun an ni.

Nizan khan kai thar Mohammedan SC leh NorthEast United ten ISL match an khel a, result kan hre hman lo. Zanin dar 7:30-ah match khat a awm dawn a, FC Goa chuan Khalid Jamil-a enkawl Jamshedpur FC an mikhual dawn.

India coach Manolo Marquez enkawl FC Goa hian Dinthar tlangval Ayush Chhetri bakah midfielder Lalthangliana (AB-a) leh Malsawmtluanga te an kawl a, Jamshedpur hian midfielder C. Lalhriatpuia an kawl bawk.