Juventus-in a chanve an zo phawt

Thawhlehni zan khan Champions League quarter-final first leg inkhelah Italian Champion Juventus chuan an khelmualah France club ṭha Monaco chu Arturo Vidal penalty hmangin 1-0 in an hneh.

Kum 2003 hnuah Juve hian Champions League semi-final an la lut leh lo a, kuminah erawh an record duhawm lo thaibo turin kawngdik an zawh mek.

Inkhel chu

Juventus lamin inhliam vangin midfielder Paul Pogba chhawr thei lo mah se Andrea Pirlo a lo kir leh tawh a, tlar hmaah Carlos Tevez an neih bawk avangin an zam lo. Inkhel ṭan aṭanga minute 10 pawh a liam hmain Tevez chuan goal khung tumin Monaco goal-ah vawi hnih a pet hman tawh. Mahse a vanneih zan a ni lo a, goal a khung nghal mai bik lo.

Monaco lam an awm mai mai bik lo forward Yannick Ferreira-Carrasco leh Layvin Kurzawa te hmangin Juve tlar hnung an chhaihbuai zui ve nghal. Team pahnihin chungnung zawk nih an tum ve ve a midfield-ah ball an inchuh nasa.

Midfield-ah Joao Moutinho a hmuhnawm a, ani hian box pawn aṭangin goal thun tumin a pet, mah se goal pawnah a kal hlauh. Hemi hnu hian Moutinho hian Kurzawa tan ball a vawrh a, mahse Kurzawa hian a tauh over hlauh. Juve tan tlar hma lamah Tevez a ṭangkai a, a goal shot ṭha tak mai chu Monaco goalkeeper Danijel Subasic-a'n a lo dan sak.Chawlhlawk an hman hma deuhin Manchester United defender hlui Patrice Evra chuan goal khungna hun ṭha a hmu a, mahse ani pawn a thun thei bik lo, goal chungah a pet tlawk luah. Goal lut loin chawlhlawk an hmang.

Second half inkhel an ṭan leh chiah a, mikhual Monaco an hlauhawm nghal. Moutinho a hmuhnawm leh nghal. A ball cross ṭha zet mai chu Italy defender Andrea Raggi-a'n Juve goal-ah a tauh goal teuh hle a, goal pawn chiahah a kal. Minute 54-na a ni tawh, Chelsea defender hlui Ricardo Carvalho chuan box chhungah Juve striker Alvaro Morata a tih tluk avangin penalty a chawi a, yellow card pek a ni bawk.

Penalty pet tur hian Chile midfielder Arturo Vidal a lo ding chhuak a, ani hian chiang takin goal-ah a chantir. Monaco-in an siphurh sut tumin an nawr let nghal. Geoffrey Kondogbia chuan box pawn aṭangin ṭha takin a pet a, mah se Gianluigi Buffon-an a lo dan sak.

Panalty hlawh chhuaktu Morata chuan hun ṭha a nei zui ve leh nghal. Ani pawh hian box pawn a aṭangin kawh takin Monaco goal-ah a pet a, mahse goal veilam sirah a kal hlauh.

Monaco lamin goal khat phur chunga inkhel tawp tir mai an tum bik lo, manager Leonardo Jardim chuan inlkhel thlak danglam turin Andrea Raggi lachhuakin striker Dimitar Berbatov a luhtir. Manchester United striker hlui Berbatov hian field-ah minute hnih chauh a hmang hman tihin goal khungna hun ṭha a hmu nghal. Carrasco-a ball cross chu a tauh goal teuh hle, goal sirah a kal hlauh.

Inkhel tawp thlengin goal dang a lut zui tawh lo. Juve tan vanneih ni a ni a, Monaco lamin an goal khung loh ho an ui hle thung ang. Second leg hi Monaco khelmual Stade Louis II a khelh leh tur a nih avangin Monaco dinhmu a la chhe bik lo a, Juve pawh an dinhmun ala him bik lo.

Manager te thukhawchang

Juventus manager Massimiliano Allegri chuan, "Inkhel result ṭha tak a ni. Monaco kha team ṭha tak an ni a, kan khelmual a goal kan chhuah lo kha a ṭha hle. Zanin khan kan vannei bawk. Goal khat kan neih sa avang khan kan him tihna ala ni lo a, inthlahdah thei kan la ni lo a ni. Tunah hian League-ah leh Coppa Italia-ah inkheh hmabak kan la neih avangin kan insan mar reng a ngai ang," tiin a sawi.

Monaco manager Leonardo Jardim chuan, "Inkhel bul kan ṭan ṭha a, a tir minute 20 chhung inkhel kan thunun bakah second half-ah pawh a tir lam minute 20 chhung vel chu inkhel kan thunun hle bawk, mahse kan goal khung theih loh kan tuar a ni. Club ṭha nena inkhelh chuan chance vawikhat neih chhawr ṭangkai loh palh hi a pawi thu ṭhin hle. Penalty kha pek awm niin ka hre lo a, kha khan inkhel a ti danglam vek a ni," tiin a sawi.