Arsenal inkhel hi a hmuhnawm - Wilshere

Arsenal midfielder Jack Wilshere chuan a ṭhiante inkhel chu hmuh­nawm a tih thu leh hetiang a khel chhuak thei tur hian an beih nasat thu a sawi.

England international Wilshere hi nikum No­vem­ber aṭang khan a hliam vangin first team-ah ala inkhel lo a, a ṭhainte inkhel chu khelmual sir aṭangin a lo thlir ṭhin a ni. Premier League-ah Arsenal-in match riat chhung hnehna an chan zawn laiin a inkhel ve thei lo.

Thawhlehni khan Wilshere hi Arsenal Under-21 game-ah a inkhel a, reilote-ah first team-ah kan hmu thuai­in a rinawm. Arsenal hian Permier League hmahruaitu Chelsea chu point sarihin an pha lo mek a, an khelmual Emirates Stadium-ah April 26 khian Chelsea an mikhual dawn a, he inkhel hi a pawimawh hle ang.

Kum 23-a upa mid­fielder chuan, "Tunah hian kan club boruak a ṭha em em a, nuam ti takin player zawng zawng hian an khel vek a ni ber mai. Hliam vangin kan inkhel tam ve thei lo erawh a pawi ka ti a, mahse ka ṭhian­ten ṭha tak an khel lai lo en hi a nuam in a hlim­awm tho a ni," tiin a sawi.

Sawi chhunzawmin Arsenal midfielder chuan, "First team ka zawm tirh khan player senior ṭhenkhatin club an chhuahsan a, mi tam tak chuan Arsenal hi an dingchhuak tawh lo ang ti hialin an sawi ṭhin, mahse tunlai a kan inkhel entute chuan a nih loh zia an hre chiang hle ang. Player ta kan inpum khat ṭha in manager ṭha tak hnuaiah nuam ti takin kan khel thei a ni. Tuna kan team khelh dan hi a hmuhnawm in hetiang a khel chhuak tur hian kan zir nasa hle," tiin a sawi.