India a rawn kir ka duh - Garcia

Atletico de Kolkata marquee player Luis Garcia chuan Indian Super League-a khelh leh ngei a duh thu a sawi chhuak.

Liverpool midfielder hlui Garcia chuan, "ISL-a kir leh hi ka duh a ni. Min la duh tih chu ka hria a, mahse mumal takin min la be lo. Ka la nghak mek a ni," a ti.

Spanish midfielder chuan ISL inkhel entu chungchang sawiin, "Ope­ning ceremony-ah khan mipui 80,000 an pungkhawm a, invenna uluk vangin an tam tawk lo. Tam ngawr ngawr chu duh nise Salt Lake Stadium-ah khan mipui 1,20,000 pawh an pungkhawm thei ang. Match tinah sing thum aṭanga sing nga an pungkhawm a, ISL hlawhtlinna lantirtu a ni," tiin a sawi.

Champions League nomawi chawi tawh Garcia hian ISL fak mah se India ramin foot­ball kaihhnawih infra­structure a neih loh avangin India ram football a ṭhan chak loh tur thu a sawi bawk.

Garcia chuan, "India ram football chu pro­fessional level a la ni pha lo a, amateur level vel a ni. Player ṭha chu an awm ngei a, mahse player nawlpui an ṭha lo. Hmanrua an neih ṭhat tawk loh vang a ni a, academy awm ṭhat tawk loh vang a ni bawk. Naupang kum nga aṭanga inkhelh dan kalhmang zir tir thei tur coach an nei ṭha tawk lo a, kum 13 vel aṭangin an inkhel chauh ṭhin. ISL hmasa ber a hlawhtling a, he league hian India ram football-ah danglamna a thlen thei a ni," tiin sawi.