Cricket hlutna India-ah a tlahniam
India ram an sawi apianga lang tel nghal ṭhin chu Cricket a ni. Mipui tluklehdingawn chuang awmna ram in infiamna zinga a lawm ber a nih avangin sumdawng te pawn cricket sponsor tu nih an inchuh a, sum tam takin an vawm ruih ruih ṭhin. Mahse, tunhnaiah infiamna chi hrang hrang football, tennis, hockey leh kabaddi te thlengin inelna en tlak leh hmuhnawm zawk min chhawpchhuah sak a, India cricket in hei hi a tlakhniam phah hle niin Sports leh Entertainment lama sum che vel buaipui ṭhin GroupM ESP report chuan a tarlang.
Ground sponsorship (tournamnet huaihawttu te'n sponsorship aṭanga sum an hmuh zat) aṭanga cricket in 2013-a vaibelchhe 508.3 lai a hmuh laiin 2014-a a sum lakluh zat erawh vaibelchhe 464.7 chiah a ni a, a tlakhniamna hi a tam tham hle.
Team sponsorship aṭanga team hrang hrang sum hmuh zat belhkhawm hi 2013-ah khan vaibelchhe 389.2 lai niin kum 2014-ah erawh vaibelchhe 347.8-ah a tlahniam thung. Kum 2014-a Sports industry in sum a lakluh zawng zawng zat chu vaibelchhe 4,809.69 niin kum 2013-a sum lut zat erawh vaibelchhe 4,372.5 a ni thung. Kum 2014-a sports industry sum lakluh zat 10%-a a pung chunga cricket tlakhniamna hian cricket dinhmun chu a tarlang chiang viau.
Sports industry sum lakluh a punna chhan hi tournament thar hrang hrang vang a ni pakhat. Football aṭangin India Super League, hockey leh kabaddi tournament pahnih, International Premier Tennis League tournament te nikum khan khelh thar a ni a, heng ho hian sports industry sum lakluh a ti pung nasa hle a ni.
GroupM ESP national director Vinit Karnik chuan, "2014-a India cricket team sum lakluh tlakhniamna chhan hi India ram chhunga India cricket team in international match an khelh tlem vang a ni bawk. Mahse, a bulpui ber erawh kum 2014-a BCCI in sponsorship sum a hmuh tlem vang a ni," a ti.
Kum 2014-a India cricket team in match an khelh apianga an inkhel TV-a tihchhuah man Star TV in an pek zat hi vaibelchhe hnih a ni a, a kum hmasa lawk 2013-a Airtel in match khata vaibelchhe 3.33 an pek nen chuan inthlau tak a ni. Cricket in ngaihventu a neih tlemna tilang chiang tu pakhat chu 2013-a 'title rights' inchuhtu hi company sawm lai an nih laiin 2014-ah erawh Star leh Micromax chiahin an inchuh a, a chhang huai zawk Star in an chhanna pawh hi a kum hmasa lawka Airtel chhanna nen a inthlau hle a ni.
India rama infiamna zingah Football hmasawnna a nasa ber a, kum 2013-a team sponsorship vaibelchhe 26.5 chauh hmu khan 2014-ah erawh vaibelchhe 60.3 a ni. Hei hi nikuma India Super League an khelh ṭan vang a ni. Infiamna dang kabaddi, tennis leh hockey te ho in 2013-a vaibelchhe 7 chiah sponsorship an hmuh laiin 2014-ah erawh a zuan in a zuang a ni ber a, vaibelchhe 74.5 lai an hmu a ni.
GroupM ESP in a report dan chuan infiamna chi hrang hrang in 2014-a team sponsorship aṭanga sum an hmuh zat hi vaibelchhe 493.6 a ni a, kum 2013 a an lakluh zat vaibelchhe 432.7 aia a punna hi 14% zet a ni. Cricket tiam loha infiamna dang in sum an hmuh zat 2013 aia 2014-a a punna hi 30 % zet a ni bawk.
Cricket chhandamtu IPL
Cricket sum lakluh a tlakhniam viau laiin Twenty20 cricket tournament IPL erawh a la kal vung riah viau. Kum 2014-a Lok Sabha inthlan vangin IPL hi ram dang United Arab Emirates-ah khelh a ni a, a hlutna a tlakhniam phah. Mahse title sponsor Pepsi in kum tin atan vaibelchhe 80 pek an inhuam avangin sum lamah an buai phah lutuk hran lo. IPL Tv lama pechhuaktu Multi Screen Media chuan kum 2015 IPL tournament aṭang hian vaibelchhe 950 hmuhchhuah an inbeisei a ni.
PepsiCo India senior director-marketing Ruchira Jaitly chuan, "Cricket hi a tlahniam tihna a ni lo. Tunhnaiah sports hrang hrang an rawn ṭhang a, sponsor tur an awm nual tak vang mai mai a ni. Pepsi pawhin cricket kan sponsor rualin kabaddi, football leh hockey-te pawh kan sponsor tho a ni. International quality heng infiamna hrang hrang te hian an phochhuah avangin sponsorship pawh kan semrual a ni," a ti.
Sports management lam khawihtu firm Kwan CEO Indranil Das Blah chuan, "Cricket hi a lian ber chu a ni reng rih dawn. Tunhnaiah brand ṭhenkhatin sports dang sponsor an intih hmuh mek a, brand tenau phei chuan sports dang sponsor hi awlsam an ti zawk a, hemi sum tlingkhawm hian sports dang a tih ṭhan phah a ni," a ti.
Kum nga liamta khan brand ho tan sports dang intihlar nana hman tur an awm mang lo. Kum thum hnuah tlem an rawn awmve deuh a, tunah phei chuan infiamna chi hrang hrang sponsor tur a tam hle. Infiamna dang hian hetiang renga hma an sawn a nih chuan cricket sum lakluh hi a tlahniam telh telh lo ang tih a sawitheih loh.