Zaninah Europa League quarterfinal Napoli hmaah Wolfsburg an ding dawn
Zanin dar 12:05-ah Europe khawmualpuia football club-te inelna sang ber dawttu Europa League quarter final first leg an khel tawh dawn a, team la dam pariatte an inlan kim vek ang.
Team pariat zinga pahnih hi Ukrainian club an ni a, Italy-in club pahnih an la nei bawk. German club Wolfsburg leh Italy club Napoli te inkhel tur hi ngaihven hlawh tura ngaih a ni.
Wolfsburg Vs Napoli
Volkswagen Arena, Wolfsburg khelmuala inkhel tur team pahnih hi tunhnaiah an dinhmun a in ang lo hle.
Wolfsburg-in tunhnai an match khelh vawi ngaah chak loh an nei lo. Vawi li hnehna chang zawkah ṭangin vawi khat erawh an hnehtawk a, an match hnuhnung berah Hamburger SV chu 2-0 in khualmualah an hneh. An chak tluang lai hi Napoli laka tihtawp an tum hauh lo ang. Europa League last 16 aṭanga Italian club Inter Milan hnawtchhuaktu an ni tih hi Napoli tan theihnghilh thiang lo chu a ni.
Napoli hian tunhnaiah result ṭha an nei lo a, an match hnuhnung pangaah vawi khat chiah an chak. Vawi hnih chak lo in vawi hnih an khingpuite an hnehtawk a, vawi khat an chak thung. An chak chhun erawh an match hnuhnung berah niin Fiorentina chu 3-0 tehmeuhin an khelmualah an sawp a, an phur vanglai tak tawn hi a chakawm loh khawp ang.
Wolfsburg tan Belgian player duhawm Kevin De Bruyne, Chelsea aṭanga an lakluh Andre Schurrle leh tun season a hman ṭhat em vanga hmanni lawka Netherlands tana khel tura an koh thar Bas Dost te hi innghahna tur an ni leh dawn a, an pathum lo dan tum hi Napoli defender-te tan hna hautak a ni ngei ang.
Napoli-in Real Madrid player hlui pahnih Gonzalo Higuain leh Jose Callejon te an kawl ve tho avangin goal thuntu tur lamah buaina an neih hmel loh. Higuain hian tun season-ah goal 13 khung tawhin Callejon hian goal 10 a khung tawh thung.
Tun hi team pahnih competitive match-a an inhmachhawn hmasak ber tur a ni dawn a ni.
Villas-Boas tan buaina
Spanish club Sevilla leh Russian club Zenit St Petersburg te inkhel tur hi inbei tawk tura ngaih an ni.
Team pahnih tunhnai record hi an intluk tawk hle, vawi nga inkhelhah vawi thum ve ve chakin vawi khat an khingpuite an draw a, vawi khat ve ve an chak lo bawk. Draw result an hlawhchhuah hi an match hnuhnung ber ve ve a ni.
Mahse, mahni khelmuala khel tur Sevilla erawh tha tho takin an khel theiin a rinawm. An match hnuhnung bera an inhnehtawkpui hi eng club mahin hmachhawn an châk ngai loh Barcelona niin goal hnih an khung thei a ni.
Zenit manager AVB tana lu hai thlak deuh tur chu a player pawimawh ṭhiau Domenico Criscito, Igor Smolnikov, Danny leh Russian Premier League top scorer ni mek Hulk te hrem vanga chhawr an ni thei lo vek tur hi a ni. An khingpui tur Europa League champion Sevilla tan erawh hei aia chanchin lawmawm a awm kher lo ang.
Fiorentina kan hmu dawn e
Europa League quarter final khel tur Italian club pahnih zinga pakhat zawk Fiorentina chu Ukraine-ah Ukrainian club hlun Dynamo Kyiv tum turin an zin chhuak dawn.
Fiorentina hi an match hnuhnung pahnihah 3-0 laia an tlawm avangin an hnual lai tak a nih hmel a, Dynamo tan hei hi hun ṭha a ni thei. Fiorentina hian an match hnuhnung pangaah vawi hnih an khingpui te hnehin vawi khat an inhnehtawkpui a, vawi hnih an tlawm thung. An match hnuhnung pahnihah Juventus leh Napoli an tum a, 3-0 in chak lo zawk ve veah an ṭang a ni.
Dynamo Kyiv hi an match hnuhnung pangaah vawi thum chakin vawi hnih an khingpuite an inhnehtawkpui a, chak loh hmel an hmu lo. Europa Last 16-a Everton nen an inkhelh ṭumin khualmualah 1-2 in tlawm zet mah se an khelmualah 5-2 in Everton an lo nghaisa a, a tlang zawkah an ṭang. Hei vang hian an khelmuala team boruak fuh loh lai taka va hmachhawn hi Fiorentina tan thil châkawm a ni lo ang.
Belgium beiseina Club Brugge
Jan Breydelstadion stadium, Brugge khawpuiah Belgian ho chhuanvawr 1991-92 Cup Winners' Cup semi final an khelh hnua European competition a semi final an luh lehna hmasa ber thlen tum Club Brugge leh Ukarainian club ṭha Dnipro Dnipropetrovsk te an inkhel dawn.
Club Brugge hi match kua hneh loh nei loa an kal tluan hnuin an match hnuhnung berah Kortrijk chu Inrinni khan 2-0 in an hneh lo. Dnipro hi insiamṭhat nan hman an tum ngei ang. Brugge hian an match hnuhnung pangaah vawi li chak hmel hmuin vawi khat an tlawm thung.
Dnipro hi an match hnuhnung pangaah chak hmel vawi li hmuin an khingpui vawi khat an hnehtawk thung. Team pahnih hi tunhmain vawi khat an lo inhmachhawn ve tawh a, Dnipro-in 3-2 in hnehna an chang. Zaninah erawh tunhma result in awmzia a nei lo ang.