French Open-ah sum a pung dawn

Grand Slam zinga clay court hmanga inelna awmchhun French Open-ah player-te dawn tur pawisa chu kumin aṭangin pound maktaduai 20.2-ah a pung chho dawn. Mipa leh hmeichhe single champion-te'n pound maktaduai 1.29 ve ve an dawng tawh dawn a ni.

Third round leh quarter final tleng pak chin te dawn tur hi nikum lam aiin 20% zetin an ti pung dawn bawk a ni. France open hi season khata Grand Slam inelna-ah chuan pahnihna a ni a, May 19 aṭang khian Paris-ah an khel ṭan leh tawh dawn a ni.

Kuminah pawisa hi tipung viau mah se Grand Slam dang te nena khaikhin chuan pawisa tlemna ber ala ni tho a, kumin kum tir a khelh zawh tak Australian Open-ah khan single mipa leh hmeichhe champion-in pound maktaduai 1.56 ve ve an dawng. Nikum Wimbledon-a champion khan pound maktaduai 1.7 an dawng bawk.

Tournament director leh French Tennis Fe­deration general director nikawp Gilbert Ysern chuan, "Tuna kan tihpunna hi hman reng tur tihna a ni lem lo a, nakinah chuan a la pung chho zel tura ngaih a ni. Tun ṭuma kan tih pun chhan ber pakhat chu player thleng sang ve lo, round hmasa lama tla ten hamṭhatna an neih ve theih nana ni deuh ber," tiin a sawi.

Tournament dangte nena khaikhin chuan US Open-ah hian lawmman a tam hle a, nikum single champion khan pound maktaduai 2.03 ve ve an dawng a ni.