Nadal aiin Djokovic a number 1 rei zawk

World number 1 Novak Djokovic chu tunkar hian chawlhkar 142 chhung number 1 a ni tling ta chiah a, khawvel mipa tennis player zing aWorld number 1 nirei thei parukna a ni ta.

Tun dinhmunah Djokovoc hian world ranking-ah point 4,310 hmuin Roger Federer chungah a awm mek a, clay court lalpa Rafael Nadal aiin kar khatin number 1 a ni rei tawh zawk a ni. Djokovic a chung chiahah hian US player chawl tawh John McEnroe a awm a, ani hi chawlh kar 170 chhung number 1 a ni thei a, ani tluk tur chuan Djokovic hian hun ala duh deuh dawn a ni.

World number 2 Roger Federer erawh tuma tluk rual lohin pakhatna ala ni zel a, Grand Slam vawi 17 champion tawh Federer hi chawlh kar 302 chhung World number 1 a lo ni tawh a ni.

Serbian tennis star Djokovic chuan, "Hetiang dinhmun ka thleng thei hi a lawmawm em em a , ka tan chuan a mak zawk hial a ni. Federer leh Nadal te nen huang khata ka awm ve ringawt pawh hi a ropui ka ti tawh a, tennis player ropui zinga ka hming alang ve ringawt pawh hi ka hlim a ni. Ka thlen chinah ka lawm rualin ka la duhtawk mai lo a, hun rei zawk number 1 ni thei turin ka theih tawpin ka bei zel ang," tiin a sawi.

Mipa tennis player World number 1 ni rei te

No Player Country Weeks

1. Roger Federer (SUI) 302

2. Pete Sampras (USA) 286

3. Ivan Lendl (CZE/USA) 270

4. Jimmy Connors (USA) 268

5. John McEnroe (USA) 170

6. Novak Djokovic (SRB) 142

7. Rafael Nadal (ESP) 141

8. Bjorn Borg (SWE) 109

9. Andre Agassi (USA) 101