2015 AFC Cup Bengaluru leh East Bengal an chak
Asia ram club-te inelna sang ber dawttu AFC Cup-ah East Bengal-in second round lut turin beiseina an nei chhunzawm zel a, Bengaluru FC dinhmun a ṭha zel bawk.
East Bengal an chak
Thawhlehni zan khan Salt Lake Stadium-ah East Bengal-in Baldeep Singh-a (22' & 71') goal hnih leh Ranti Martins (75') goal khat hmangin Singapore club Balestier Khalsa FC 3-0 in an hneh.
Kolkata club tan Bharat FC nena inkhelh ṭuma inhliam Lalrindika Ralte chu a inlan lo a, Lunglei tlangval hi a ke hliam vangin thla chhung a chawlh a ṭul dawn. Didika leh Robert Lalthlamuana inlan lo mah se S. Malsawmtluanga a khel tluan thung.
East Bengal goal hmasa ber hi Mama corner aṭanga Baldeep Singh a khung a ni a, Kolkata club-in awlsam taka Singapore club an hneh theihna kawngah Mama hi player pawimawh a ni.
East Bengal Dutch coach Eelco Schattorie chuan, "Goal kan chhuah lo kha a lawmawm hlein ka hria. Chutihrualin tuna kan fitness level ang hian Kitchee chu hmachhawn ila, min sawp hrep ang," a ti.
East Bengal hian group stage tawpna inkhelah an chung chiaha awm Kitchee chu May 12 khian an hmachhawn dawn a, chumi hma chuan hmahruaitu Darul Takzim an hmachhawn phawt ang.
Pahnihna Bengaluru
Group tin aṭangin team pahnihin second round an lut dawn a, Jalan Besar stadium, Singapore-ah minute 76-naa Robin Singh-a goal hmangin I League champion Bengaluru-in Singapore club Warriors FC an hneh.
Inkhel pawimawhah Ashley Westwood-a'n Seasn Rooney aiah Mizo tlangval Beikhokhei Beingaichho a ring zawk a; keeper-ah Lalthuammawia Ralte awmin defence-ah Lalchhuanmawia a awm bawk.
Bengaluru hian point kua an hmu tawh a, an hnuaia awm Maziya laka point an hlawhchhuah chuan stage sang zawk an thleng thei ang.