I League Second Division Hmahruaitu Aizawl FC hmaah Chanmari FC
I League Second Division aṭangin club pakhat chiahin I League an lut dawn a, hmahruaitu chu Aizawl FC an ni a, Mizoram club tan I League-ah hian hmun a awm chiang a ni.
Zing dar 9:30 hian Kanchenjunga Stadium-ah MPL3 Final Rematch khelh a ni dawn a, Aizawl FC leh Chanmari FC te a vawi khat nan Mizoram pawnah an inhmachhawn ang.
Club inhal
Aizawl FC hi kum 1984
aṭanga din ṭan a ni a, Mizoram football history-a football club hlawhtling berte zing ami an ni. Amaherawhchu an hun laia club ṭha dangte ang bawkin an tlu chhia a, a tawp zui bawk. Kum 2012 khan Mizoram Football Management Group (MFMG) thawhrimna zarah he club hi din thar leh a ni a, kum 2013 aṭangin TṬ Royte Group thuneihna hnuaiah a awm a; company founder & chief managing director, Robert Romawia chu club neitu a nih bakah President a ni.
Chanmari FC hi kum 2011 khan din ṭan a ni a, a din tirhin mumal lo mah se Chanmari Veng-in 2012 Red Ribbon Football an champion avangin football club ṭha zawkin an chei hnum a, Mizoram club ṭha zingah an tel nghal.
MPL1 Playoff-ah Aizawl FC leh Chanmari FC hian player ṭha an kawl tam avangin an inel nghal a, Playoff-ah Chanmari FC-in Aizawl FC 2-0 in hneh mah se a tawpa hmahruaitu chu Aizawl FC an ni a, goal difference-in Chanmari FC aiin an sang zawk.
MPL1-ah Aizawl FC leh Chanmari FC te'n beisei an pha lo ve ve a, MPL2-ah Chanmari FC-in coach H. Vanlalthlanga hnuaiah harhtharna changin an champion. MPL3-ah K. Malsawmkima hnuaiah Aizawl FC-in an theihna an lanchhuah tir a, champion lai hnehin an champion. Aizawl FC boss Mala hi Chanmari FC-in MPL2 an champion ṭuma an hneh Luangmual FC coach kha a ni.
Aizawl FC leh Chanmari FC boruak a sang a, coach pahnih Mala leh Thlanga te hian record ṭha zawk neih tumin an inel chho zel. Santosh Trophy-a Mizoram champion puitu chu Thlanga a ni a, National Games-a Mizoram champion puitu chu Mala a ni. Tun hnaiah Thlanga aiin Mala record a ṭha zawk.
Phaiah chuan
Aizawl FC hian I League 2nd Division-ah tawnhriat an nei tawh a, kum 2012-a an tel hmasak ber ṭum khan final round an lut nghal a, hemi hnu hian result chhuan tur an nei lo. Chanmari FC erawh tun hi Mizoram pawna inelna an hmachhawn vawi khatna an ni a, club angin tawnhriat an nei ṭha tawk lo.
Aizawl FC-in MPL3-a an chet ṭhat an chhunzawm zel a, Siliguri-ah vawi ruk khelh tawhah an la chak vek. Record ṭha a ni nachungin Aizawl FC hian inkhelh apiangin goal an chhuah a, match riat khelh hmabakah anmahni hnaih bertu Lonestar Kashmir aiin point nga laiin sang mah se an dinhmun hi a la nghet tawk lo.
Chanmari FC-in bul an ṭan ṭha a, Round thum khelh zawha goal 15 khung thei khan Round hnuhnung pathumah goal nga chauh an khung tawh a, a tir match thuma point kaw hlawhchhuak thei khan a hnuhnung match thumah point hnih chiah an hmu. Chanmari hian I League khelh an tum a nih chuan chetsual a thiang tawh lo.
In cho tawk
I League second division ṭan tirh khan Aizawl FC coach K. Malsawmkima'n MPL-a an elpui Chanmari FC chu team ṭha ber zing ami an nih thu leh khelhpui châkawm lo pawl an nih thu a sawi.
Mala hian Chanmari chungchanga a ngaihdan a la ngai reng a, mah se a zam lo. National Games-a Mizoram champion puitu coach Mala chuan, "Kan inbei tawk khawp ang. Min huphurh bik dawn lo a, keini pawhin kan hlau bik lo. Chak kan tum em em a ni," tiin point thum hlawhchuah ngei an tum thu a sawi.
Aizawl FC hian defender Emma Chigozie chu inhliam vangin an chhawr thei lo maithei a, a bak chu an dam kim. Nigerian defender a khelh loh chuan tlar hmaah goal thum khung tawh ve ve Liberian forward Alfred Kemah Jaryan leh Nigerian forward Justice Morgan te an inkhawp thei ang.
Aizawl FC president Robert Romawia Royte chuan, "Zoramin I League club neih hi a châkawm, chu chu Aizawl FC din thar lehna chhan a ni. Pathian leh kan team te zarah 2nd Division I League-ah hmahruaitu kan la ni zel a, lawmthu sawia hmun hrang hranga Zofate ṭawngṭaina rah a ni. Team leh mipui chungah lawmthu kan sawi," a ti.