MSL Preview Zaninah a chung ber leh a mawng phah

Zanin dar 8:00 hian Hawla Indoor Stadium-ah Mizorama basketball inelna lian ber Mizoram Super League chu khelh a ni leh dawn a, table-a hmahruaitu Khatla TBL leh table mawngphah Chaltlang Ryders te an inkhel ang.

Team pahnihte hi March 13 khan an lo inhma­chhawn tawh a, Khatla TBL hian 81-61 in Chaltlang Ryders hi an lo hneh tawh a ni. An inkhelh hmasaka an point score zat inthlauhna hi point 21 zet a nih avangin Chaltlang lam tan chuan zanin hian phuba lak theih a chakawm hle ang.

Inelna neih ṭantirh aṭanga hneh loh la tawng lo Khatla TBL hian final an lut chiang tawh a, zanin hian an player ṭha an hahchawlh tir a nih pawhin a mak hran lo ang. Tun tournament-ah hian Khatla TBL hi an chungnung fal hle a, match riat an khelh tawh aṭangin an khingpui zawng zawng an hneh fai vek a ni.

Chaltlang Ryders lam hian beisei angin an la khel chhuak lo a, player ṭha tak tak nei ve mah se chak result vawi khat chiah an la hlawhchhuak a ni. Zaninah an khingpui tur te hian player ṭha an khek anih chuan chakna hun ṭha an en theiin a rinawm.