Klopp-a'n Dortmund a chhuahsan dawn

Borussia Dortmund coach Jurgen Klopp chuan season tawpah a team enkawl lai chu a chhuahsan tur thu a sawi.

Kum 47-a upa German coach hian kum 2018 thlenga a contract neih lai chu tihtawp sak turin Borussia Dortmund chu a hrilh a ni.

Klopp chuan, " Ka hnaah hian ka chauh tak em avang emaw ka peih tawh loh vang lam a ni lo. Eng club nen mah inbiak lawkna kan nei lo a, mahse chawlh erawh ka tum chuang lo," tiin season tharah team dang enkawl a tum thu a sawi.

Kum 2008-a Dort­mund coach hna chelhtu Klopp chuan, "He club tan hian coach ṭha ka nih loh hun hunah ka bang ang ka lo ti tawh ṭhin a, ka thutlukna hi thutlukna dik tak niin ka hria. He club ropui tak hi a enkawl tur diktak manager in an enkawl a hun a ni," tiin a ban chhan chu tun season Bundesliga lama Dortmund a chet chhiatpui vang a nih thu a sawi.

Bundesliga title vawi hnih leh Champions League final 2012-13 season-a khelhpuitu Klopp hian tun season-ah Dortmund hi a chet chhiatpui hle a, table-ah sawm na ni mekin hmahruaitu Bayern Munich aia an hniamna hi point 37 zet a ni.