UCL Review Atletico-in Real an chelh
Vicente Calderon-ah Real Madrid-in goal an khung thei lo a, Madrid Derby hnuhnung pasarih Atletico Madrid an tlawm lo. Thawhlehni zan khan goal awm loin Real leh Atletico an inhnehtawk.
April 22 khian Santiago Bernabeu-ah second leg an khel dawn a, goal awma an inhnehtawk a nih chuan Atletico hi away goal rule hmanga semifinal lut tur an ni.
Nikum final-ah Real-in Atletico an hneh a, an champion. AC Milan-in kum zawna (1989 & 1990) European Cup an chawi hnua champion nawn hmasa ber nih an tum ruh hle.
First leg-ah Atletico keeper Jan Oblak-a'n Real Madrid tlar hma a ti beidawng a, defender Diego Godin tihsual vanga Gareth Bale-a chance ṭha tak chu Slovenian keeper hian a dang ṭha hle.
Kum 22-a upa Oblak hian James Rodriguez goal khung tur ṭha takin a dang a, Cristiano Ronaldo freekick a dan sak bawk.
Portuguese forward hian Champions League-ah goal 75 a khung tawh a, Lionel Messi goal khung zat nen a intluk chiah.
Ronaldo-a'n record thar siam thei lo mah se keeper Iker Casillas-a'n record thar a siam tho. Spanish keeper hi Champions League-ah vawi 147 inlan thei hmasa ber a ni.
Hun tawp hma hretin Casillas hian Atletico midfielder Mario Suarez goal khung tur chu a dan sak a, Fernando Torres-a ball tauh goal zawnah a kal lo bawk. Minute 90 chhung goal a lut lo.
Real left wing back Marcelo leh Atletico midfielder Suarez-a te'n yellow card an hmuh avangin Bernabeu-ah an inlan ve thei lo ang.
Real Madrid-in Champions League game hnuhnung 47-a goal an khung loh vawihnihna chauh a ni a, November 2007 hnua goal an khung lohna hmasa ber a ni bawk.
Atletico tlar hnung phui theihnaa thluak bur Diego Simeone chuan, "Second half-ah khan inkhelh dan kalhmang kha kan thlak danglam thei a, chak tur a chiang lo tih kan lantir a ni. Kan keeper Oblak kha a khel ṭha em em a, Atletico hi team naran dang ang chu nise second half-ah khan kan tlawm ang," tiin a team-te rilru put hmang chu a fak hle.
Real Madrid coach Carlo Ancelotti chuan, "First half kan khelh dan kha duhthusam a ni a, goal kan khung thei loh erawh a pawi hle. Second half erawh a dang a, Atletico an khel ṭha a, inkhel thunun kan harsat a ni. Bernabeu-ah first half kan khelh dan anga khelh kha kan tum ang. Tuna kan resutl hi ṭha tawk lo mah se semifinal thleng turin inrinawkna kan nei a ni," a ti.