Zanin dar 12:30-ah 2023 UCL final rematch : Manchester City Vs Inter Milan

UEFA Champions League-ah Manchester City-in zanin dar 12:30 hian Etihad Stadium-ah Inter Milan an mikhual ang. Premier League champion lai leh Serie A champion inkhel tur a nih bakah 2023 UCL final rematch a nih avangin en a châkawm hle.

Man City hian season bul an la ṭan ṭha a, match hmasa paliah chak vekin table chung berah an awm. Inter erawh match li an khelh tawhah tlawm la nei lo mah se ṭum hnih an khingpuite nen inhnehtawkin pathumnaah an awm mek.

Kum khat liam ta

June 10, 2023 khan Ataturk Olympic Stadium, Istanbul-ah Manchester City-in a vawi hnih nan Champions League final an khel a, Europe inelna sang bera la champion ngai lo English club hi rinkai ni mah se Inter Milan lakah an talbuai hle.

City-in ball chang tam mah se goal chance-ah erawh an intluk tlang a, second half-ah phei chuan Inter Milan-in an ngah zawk. Minute 68-naah Rodri-a'n goal awmchhun a khung a, City an vannei hram. Pep Guardiola kaihhruaina hnuaiah City-in a vawi khat nan UCL champion nomawi an chawi.

A danglam tam lo

An intawnna a la rei lo bawk a, City bul ṭantute chu zanina chhawr theih turin an la awm vek. Istanbul-a bul ṭantute chu Ederson, Manuel Akanji, Ruben Dias, Nathan Ake, John Stones, Rodri, Bernardo Silva, Kevin De Bruyne, Ilkay Gundogan, Jack Grealish leh Erling Haaland te an ni.

Bench aṭanga rawn lut Kyle Walker leh Phil Foden thlengin an awm a, khelhna hun nei ta lo Cole Palmer, Julian Alvarez, Riyad Mahrez leh Kalivin Phillips te an chhuak ta thung.

Inter Milan lamah erawh goalkeeper ball sem thiam Andre Onana a awm ta lo a; final-a captain Marcelo Brozovic bakah striker Edin Dzeko te an awm tawh lo. Final-a bul ṭantu zingah player pathum an awm tawh lo.

Goalkeeper tawnhriat nei ṭha Yann Sommer an neih belh a, France international striker Marcus Thuram an neih belh. Kumin nipui bazarah defender Carlos Augusto, midfielder Davide Frattesi, Piotr Zielinski leh Luka Topalovic bakah forward Marko Arnautovic leh Mehdi Taremi te an neih belh bawk.

A hmuhnawm dawn

Man City-in Rodri tel loin season bul an ṭan a, Euro 2024 best player hi a dam tawh. Kar tawpa City-in Brentford an hneh ṭumin Rodri hi bench aṭangin a lut a, Inter Milan an hmachhawn hunah bul ṭan tura beisei a ni.

Pep Guardiola hote hian season liam ta khan nomawi an humhim thei lo a, Real Madrid lakah an vanduai. Kuminah erawh City hian champion ngei an tum dawn a, chumi tur chuan theihna pawh a nei. English club hian an mualah match 31 chhung hneh loh an tawng tawh lo a, Inter tan Eithad Stadium luhchhuah hi a harsa ang.

City tana chanchin lawmawm chu Alvarez chhuak mah se season dang zawng aiin Erling Haaland-a'n season bul a ṭan ṭha. Norwegian striker hian match li lek aṭangin goal kua a khung der tawh a, a goal khung zat hi striker ṭha tam takin season khata an khung zat a ni.

Inter hian tun season match li aṭangin goal thum an chhuah tawh a, City hmachhawn hunah tlarhnung player-te tan Haaland ven chu hna hmasa a ni ang. Mahse, Benjamin Pavard, Acerbi leh Bastoni te hian tawnhriat an nei ṭha a, City tan paltlang a awl bik lo ang.

City tlarhma a phui bik lo a, Inter tlarhmaah Thuram leh Lautaro Martínez te an inkawp avangin Pep-a'n a dan dan turah ngaituahna a seng ve khawp ang. English club hian Inter ang thoin tun season match li an khelh tawhah goal thum an chhuah.

UCL Kalphung thar

UEFA Champions League-ah team 36 an tel a, league table pakhat an inṭawm dawn. Team tin match riat ṭheuh an khel dawn a, mahni mual (home) ah match li an khel ang a, khual mualah (away) ah match li dang an khel ang.

League round khelh zawha a sang pariatin last 16 an lut nghal dawn. Table-a pakuana ṭanga 24-na (team 16) ten playoff hmangin last 16 khel tur an zawng ang. Pakuana aṭanga 16-na te chu seeded an ni ang a, an mualah playoff second leg an khel ang.
UCL aṭangin Europa League-ah a tlak thlak theih dawn tawh lo a, table-a 25-na leh a hnuai lam zawng chu an tla fel nghal ang.