Athletics-a Mizoram dinhmun hriatna tur Athletics Meet

Mizoram Open Athletics Meet vawi 31-na chu September 24-26, 2024 hian RG Stadium, Mualpuiah neih a ni dawn a, NorthEast Olympic leh National Games-a Mizoram chet ṭhat theih nan athletics-a hmasawn hi a ṭul hle.

NorthEast Olympic leh National Games-a medal tamna athletics-ah Mizoramin medal la pha chu sawi loh beisei pha pawh a nei ngai lo. Mizoram Athletics Association-in hma a la a, hmasawnna a awm em tih chu Mizoram Open Athletics Meet aṭangin a hriat theih ang.

Athletics-ah hi chuan infiammite record aṭangin national level emaw internatonal level emaw an ni pha em tih a hriat vek a, hei vang hian tun ṭum Athletics Meet aṭang hian Mizoram dinhmun thui tak a lang thei ang.

Mizoram Open Athletics Meet-ah hian mipa leh hmeichhe inelna a awm dawn. Mipa inelnaah hian intlansiakah 100m, 200, 400m, 1500m leh 10,000m te a awm dawn a; 4x100m relay race a awm bawk ang. Inzuansiakah high jump, long jump leh triple jump a awm dawn a; discuss, javelin leh shot put te a awm dawn bawk.

Hmeichhe inelnaah intlansiak awm dawn a; 100m, 200, 400m, 1500m leh 5,000m te a awm dawn. High jump leh long jump bakah discuss, javelin leh shot put hmanga inelna a awm ang.

Inelna hi Mizoram Athletics Association buatsaih a ni a, tun ṭuma che ṭhate hi October thlaa neih tur 35th East Zone Junior Championship, Bubhaneswar-ah Mizoram ai an awh ang.

Mizoram Open-ah hian a duh apiang tan tel theih a ni a, phone number 8787334142/7005774720-ah zawhfiah theih a ni.