Aizawl FC dal theitu FC Bethlehem

LZ Juice MPL11 match 10 khelh zawhah Aizawl FC-in pakhatna dinhmun an luah a, match li khelh hmabaka an chak vek chuan Victor Lalbiakmawia hote hi league champion an ni dawn. I League club hian vawiin chhun dar 12:00 hian table mawngphaha awm FC Bethlehem an hmachhawn dawn a, Victor hian nomawi chawi a duh a nih chuan a club hlui lakah zahngaihna a lantir thei lo ang.

Aizawl FC hian match hnuhnung berah Mizoram Police an hneh a, inkhel boruak sangah I League club-in Police lakah I Day Football final phuba an lak theih avangin inrintawkna nasa nei dawn. Victor-a hote hian match 10 aṭangin goal 28 an khung thei a, an goal bawh a na tih a chiang hle.

Champhai Zotlang tlangval BD-a'n goal sarih a khung tawh a, I Day Football top scorer hian MPL11 top scorer nih a tum dawn. Chutihrualin Aizawl FC erawhin mimal lawmman aiin team hlawhtlinna an ngai pawmawh dawn a, FC Bethlehem laka point thum chu an tum ber tur a ni.

Chutihrualin Aizawl FC khingpui tur Bethlehem hian relegate pumpelh tur chuan point hmuh ngei an mamawh a, Lalhriatpuia Sailo hote hian an chunga awm Chawnpui hi point rukin an pha tawh lo.

Bethlehem hian match hnuhnung berah an elpui Chawnpui 3-1 in an hneh lo a, an theihna an hriat chian a pawimawh ta hle. An intawn hmasak ṭumin Bethlehem hian Aizawl FC hi 6-1 ngawtin an ngam lo a, chuvangin I League club laka point khat hlawhchhuah ringawt pawh hi FCB tan chuan a hlui khawp ang.