Tlai dar 3:00-ah MPL11 quarterfinal?

Vawiin tlai dar 3:00 hian LZ Juice MPL11-ah Sihphir Venghlun FC leh Mizoram Police FC te an inkhel dawn. Police hian Sihphir Venghlun hi an hmachhawn hmasak ṭumin 6-0 zetin sawp mah se point 13 ve ve an hmuh avangin MPL champion lai hi chak chiangsaa dah a rem lo.

Sihphir Venghlun hian inrintawkna nei turin an match hnuhnung berah Chanmari FC chu 4-1 in an sawp a, Lalthanpuia'n (Tepuia) goal thum a khung. Sihphir Venghlun forward Tepuia hian tun inelnaah goal ruk a khung tawh a, top scorer beiseina a nei pha hial.

Police erawhin an match hnuhnung berah Aizawl FC an hneh lo a, pathumnaah la awm mah se pangana nena an inthlauhna hi point khat chauh a ni. I Day Football leh MPL nomawi kawltu Police hian Sihphir Venghlun hi an hneh lo a nih chuan a sang pali aṭangin an chhuak ang.

MPL11-ah quarterfinal awm lo mah se vawiin inkhel turte hi pathumna leh palinaah an awm a, a chak lo zawk hi a sang pali aṭanga an chhuah theih avangin inkhel hi quarterfinal ang hiala ngaih theih a ni.