Mizo tamna Mohammedan-in NE United an hneh lo

Indian Super League chu khelh chhunzawm zel a ni a, Durand Cup champion NorthEast United chuan tun season-a an match hmasa berah kai thar Mohammedan Sporting Club chu 1-0 in an hneh nghal.

Team pahnih hi 0-0 in an inhnehtawk mai dawn niin a lang hman a, mahse, hun pek belhah Alaeddine Ajaraei chu inlarin, Highlander tan chakna goal a khung. Kolkata club tan chhanglet turin hun a awm tawh lo.

Nizan khan FC Goa leh Jamshedpur inkhel ve lehin an result kan hre hman lo a, zaninah ISL a awm lo ang - nizana club pahnih an inkhelh hian ISL club 12-te an inlan chiah dawn tihna a ni a, Hyderabad an la inlan ve lo. Zan khat an chawlh hnuah Ningani zan hian khelh chhunzawm leh tur a ni.

A vawi khatna

Mohammedan SC hi I League champion an ni a, ISL khel turin an inpetkai. An champion theih nana player thawhhlawk Zodingliana Tochhawng (Adinga), Vanlalzuidika Chhakchhuak leh Lalremsanga Fanai ten inkhel bul an ṭan vek a, Zuidika leh Remsanga tan ISL-a an match hmasa ber a ni.

Adinga erawh kum 2014-a ISL khelh ṭan a nih khan NorthEast United tan hian a lo khel daih tawh a, sulhnu a nei hraw hle. Mahse, Adinga leh a ṭhianten Highlander an ngam lo a, ISL-a an match hmasa berah Mohammedan an tlawm.

Remsanga'n ISL-a a match hmasa berah goal khung theihna remchang nei mah se, a chance neih a chhawr lo a, Argentine forward Alexis Gomez-a'n a chance siamsak goal-a a chantir thei lo chu uiawm a tling bawk.

A tawpah Highlander

Minute 90 chhungin team pahnihin goal an khung lo a, a tawpah erawh Highlander an vannei - hun pek belh minute linaah Thoi Singh-a siamsak chu Ajaraie-a'n goal-ah a chantir a, Kolkata club fans an ngawi chiang hle.

Mohammedan-in an ISL match hmasa bera chak an tumna chu a thamral a, NorthEast United-in ISL-ah chakin bul an ṭan ve thung. Durand Cup champion hlim an ni bawk a, ISL nomawi la chawi ngai lo team hian coach Juan Pedro Benali hoin nomawi an mitthla nghal ang.

Bollywood star John Abraham-a club NorthEast United hi ISL club dang angin an budget a sang tawk lo a, sum lamah an mawm lutuk lo - an ram pawn player zingah pawh langsar tia chhal tur an awm lo a, match hmasa bera chak nghal hi an tan a hlu dawn.

Mizo an tam

Tun season ISL-ah Mizoramin player 37 ngawt kan thawh a, Mohammedan SC chu Mizo player tamna ber niin, player pasarih ngawt an kawl - Adinga, Zuidika leh Remsanga bakah hian player dang pali an la awm tihna a ni.

Kolkata club hian Aizawl FC aṭangin full back Joe Zoherliana leh midfielder K. Lalrinfela (Mafela) an la lut a, Real Kashmir aṭangin Jeremy Laldinpuia leh season hmasaa NorthEast United tana khel Rochharzela te an la lut.

Punjab FC chu tun season ISL-a Mizoram player kawl lo an ni a, NorthEast United leh Jamshedpur ten pakhat ve ve an kawl - Highlander-ah hian Fredy Chawngthansanga a awm a, Thawhṭanni zan inkhelah hian a inlan lo.

Captain Adinga

Mohammedan SC tan tan Adinga'n captain armband hreng chungin khelmual a lut a, Mizo zinga ISL-a captain armband hreng thei pangana a ni - Armed Veng tlangval Adinga hma hian Jeje Lalpekhlua (Chennaiyin), Robert Lalthlamuana (NorthEast United), Lalengmawia Ralte (NorthEast United) leh Lallianzuala Chhangte (Mumbai City) te chu captain an lo ni tawh.

Adinga hi season hmasa I League-a Mohammedan an champion khan captain a ni tawh a, tun season-ah ISL club tan captain armband hreng Mizo tlangval pahnih an awm tihna a ni a, Adinga bakah hian Lianzuala chu Mumbai tan captain nghet a ni bawk.

Apuia hian kum 20 leh ni 44 mi niin, ISL-a captain naupang ber record a lo siam tawh a, Vaivakawn tlangval Apuia, Lza leh Adinga te hi ISL season tluana captain atana ruat tawh Mizo an ni.