Mbappe tel lohna PSG zinkawng inṭan dawn

Champions League bikah Paris Saint Germain chuan Kylian Mbappe tel loa an match hmasa an khel dawn. Luis Enrique naute hian zanin dar 12:30 hian Girona an mikhual dawn a ni.

Spanish manager Enrique hian tun hmain Barcelona a enkawl tawh a, an khingpui tur Girona hi a hrechiang dawn tihna a ni a, inbuatsaih dan pawh a hre ngei ang tih a chiang.

Season hmasa khan Mbappe a chhuak dawn tih a chiang a, hei vang hian nasa taka inbuatsaih ṭhin Enrique chuan Mbappe tel lohna PSG din turin hma a lo la daih tawh, khatih laia a player ṭha tel lo khan match an lo khel lui tawh ṭhin a ni.

Enrique hian Mbappe tel lohna team tur a ruahman lawk avangin tun season tirah pawh an buai rih lo. Ligue 1 match vawi thum an khelh tawhah an chak vek, Paris club chauh hi chak kim thei an ni hial.

PSG tan Ousmane Dembele a vul mek a, France international hi zaninah pawh tlarhma lama rinrawl a ni leh dawn. Fabian Ruiz, Joao Neves leh Marco Asensio te nena an inkawp chu Girona tan buapui tham an tling dawn tih a chiang hle.

Paris Saint Germain hian nomawi an chawi tam tawh, a bik takin France rama inelna hrang hrangah chuan an champion fo, kuminah pawh Ligue 1 nomawi an lak leh a rinawm. Mahse, Champions League erawh an la hlawh chhuak thei lo.

Arab sum hmanga siam len an nih hnuah, club thuneitu lamin an duh ber chu UCL title a ni. Neymar an lalut a, France captain Mabppe leh Lionel Messi te pathum meuh pawh an kawl laiin an champion thei chuang lo, kumina tih thut chu a harsa mai thei.

Goalkeeper ṭha Gianluigi Donnarumma chu zaninah an chhawr thei dawn lo. Italy international hi Brest nen an inkhelh ṭumin a malpui ding lam a hliam a, hei vang hian Girona hi a la hmachhawn thei dawn lo.

Girona hian kar tawp La Liga inkhelah khan Barcelona 4-1 in an ngam lo, tun season chhunga an chak loh vawi hnihna a ni. Season hmasa kha chuan February 10-ah an chak loh vawi hnihna an tawng chiah a, an boruak a inang ta lo hle. PSG mualah point khat an hmu thei a nih chuan an tan thil ṭha a ni ang.