Harsatna tam tak ka paltlang - Joshua

British boxer rothap Anthony Joshua chuan boxing khawvela a ropuina nei let leh tura theihtawp a chhuah thu a sawi a, kum 34 mi chuan, "Tun hnai kum hnih chhung khan thil tam tak ka paltlang a ni," a ti a, a thawhrim thu a sawi.

Joshua hian September 22, Pathianni zing lamah IBF heavyweight champion Daniel Dubois a hnek dawn a, an inhnek hun tur hi anni lam sanaah zan ni mah se, Mizoram aṭang chuan Pathianni zing dar 3:30 a ni daih dawn.

Wembley Stadium-ah boxer pahnih hi an intawng dawn a, a hmuna inhnek en turin fans 96,000 an pungkhawm tura ngaih a ni - a pui dawn rem rem hle.

Joshua chuan, "Rim takin ka thawk a, hrehawm tam tak ka paltlang. A ṭha thei ang ber ni turin theihtawp ka chhuah mek a ni - ka tlawm tawh loh hram ka beisei a, ka tlawm zan khan tlawm ka duh lohzia chu inhmuh kha," a ti.

Watford boxer hian WBA (Super), IBF, WBO leh IBO heavyweight title te chu a rualin a lo kawl vek tawh ṭhin a, June 2019 khan Andy Ruiz Jr. lakah lo hloh tawh mah se, December 2019 khan Andy Ruiz lak aṭang hian a la let.

Mahse, September 2021 khan Oleksandr Usyk lakah a chân a, a vawi hnih nan August 2022-ah intawng leh mah se, Usyk lakah a chak lo nawn - Joshua hi a chak loh ṭum hian a mittui a tla hial a, mahse, kawnghren neih leh ngei tumin theihtawp a chhuah mek.

Joshua hian a vawi hnih nana Usyk a ngam loh hnuah Jermaine Franklin, Robert Helenius, Otto Wallin leh Francis Ngannou te hmachhawnin, a hneh leh vek tawh a, a hmachhawn tur Dubois hi vawi 23 fight hmachhawn tawha vawi 21 chak a, vawi hnih chiah la tlawm a ni.