Beiseina thar neitu Dortmund inlan dawn

Season hmasa Champions League-ah Borussia Dortmund-in rin loh takin Champions League final an lut a, mahse, European football inelna 'specialist' Real Madrid an ngam lo.

Dortmund hian Champions League nomawi an chawi ta si lo a, Bundesliga lamah pangana an ni bawk nen, squad indintharna remchangah he hun hi an hmang - rin loh takin coach Edin Terzic a chhuak zui.

German club-in an club hrechiangtu Nuri Sahin chu coach ni turin an la lut zui a, an player hlui ho hian league match thum an khelh tawhah tlawm an la nei lo - vawi hnih chakin, vawi khat draw an nei.

Dortmund an indinthar mek a, zanin dar 12:30 hian European football-a an theihna tak tak chu fiahin a awm dawn - zan dar 12:30 hian Club Brugge chu khualmualah an lenchilh ang.

Indinthar hna

Dortmund hian coach thar chauh an la lut lo. Club player hlui, kum 1997-a Champions League nomawi an chawi ṭuma chakna goal khungtu Lars Ricken chu Sporting department hotupa berah ruat a ni a, ani ho hian club transfer leh thil dang an buaipui.

Dortmund tana match 362 zet khela Bundesliga nomawi vawi thum chawi tawh Sebastian Kehl chu Sporting Director a nih chhunzawm a, rei tak Dortmund-a scout ni a, hnathawk ṭha tak Sven Mislintat chu Dortmund-ah hian a kir leh bawk.

Coach-ah club youth system chhuak ngat Nuri Sahin lakluh a nih bawk avangin Dortmund hian 'Dortmund' taka engkim kalpui leh an tum tih a lang a, club indinthar hna an thawk mek.

Kehl chuan, "Season hmasa thil thleng dan kha uluk takin kan thlir a, chumi mil chuan hma kan la. A chang chuan hun ṭha neih hi bawhpelh loh hram kan tum a ni," a ti a, an indinthar chhan a sawi.

Mangṭha

Dortmund hian striker ṭha Niclas Fullkrug pawh ui loin an chhuahtir a, loan-a an hawh Jadon Sancho leh Ian Maatsen te pawh an chet ṭhat ngaihtuahin, a ngheta an lakluh rin ni mah se, an club lamah an kir tir.

Mi tam zawkin 'Dortmund fapa rangkachak' tih hiala an koh, club lian zawk sawmna hnara Dortmund tana rinawm thlangtu Marco Reus pawh chelh loin chhuahtir a ni a, Mats Hummels pawhin season hmasa hmang ṭha viau mah se, an chhuahtir.

Hetihlai hian damlohna avanga rei tak a chawlh hnua lo kir, a hma ang phak ta rih chiah lo Sebastien Haller pawh loan-a chhuahtir a ni a, Dortmund hian squad dinthar an tum tih a takin an lantir.

Kehl chuan, "Kan squad-a player awm zat nasa takin kan rawt hniam a, player naupang zawkten chance an neih theih nana he ruahmanna hi kalpui kan ni," a ti a, club dinthar hna thawk turin 'risk' an la a ni ber.

Squad thar chu

Dortmund hi an indinthar tih avangin uchuak takin player an la lut lo a, awmze nei loa sum sen an tum lo. Season hmasaa league match 28-a goal 28 khungtu, VfB Stuttgart forward Serhou Guirassy chu an player lakluh langsar bera chhal ngam a ni.

Euro maktaduai 18 man player hian minute 72 chiah khelmualah hun a la hmang a, goal a la khung rih lo thung. Hetihlai hian Stuttgart aṭang thoa an lakluh, centre back Waldemar Anton chuan DFB-Pokal nen match li a khel tawh a, hmun pawimawh a chang - goal khat a khung tawh.

Germany forward Maximilian Beier pawhin Dortmund a zawm a, match liah goal a la khung lo thung. Kehl-a'n squad naupang zawk din an tum thu a sawi rualin, Pascal Gross chu rin loh takin an la lut thung - kum 33 a tling tawh a, a naupang lo.

Brighton & Hove Albion midfielder hian goal la khung lo mah se, match li khelh tawhah assist vawi thum a nei der tawh a, Dortmund-in indinthar hna an thawh mek hi a fuh dawn leh dawn loh chu a chiang chho zel ang - zanin hi tehna tur pawimawh pakhat a ni.