Spurs leh Postecoglou tan fiahna

An hmelma Arsenal lakah Tottenham Hotspur an chak lo a, club dang laka chak loh aiin an rilru pawh a na zawkin a rinawm - Spurs leh an coach Ange Postecoglou ten League Cup lamah fiahna an hmachhawn zui dawn.

Zanin dar 12:30 hian Tottenham chuan Carabao Cup third round khel turin Coventry an lenchilh dawn. Championship club lakah North London club hi rinkai zawk an ni dawn a, season bul an ṭan fuh lohna insiamṭhat theihna remchang a ni bawk ang.

North London club hian nomawi chawi an harsat hle, an striker ṭha Harry Kane ho meuh pawh an champion thei lo. Kum 2008 League Cup an lak hnuah eng inelnaah mah an la champion leh lo.

League Cup hi kum zabi 21-na china an title neih awmchhun a ni hial, Australian manager hoin thawnthu thar ziah an tum a, nomawi chawi ngei an duh a nih chuan League Cup bawk hi an banphak theih tur hnaivai ber niin a lang.

Kum 59 mi Postecoglou hian tun hmain tawnhriat a lo nei tam tawh. South Melbourne, Brisbane Roar leh Japanese club Yokohama F Marinos te chu kum hnih a enkawlnaah a lo hlawhtlinpui tawh a, Australia pawh a kum hnihnaah tho Asian Cup a lakpui bawk.

Tottenham hi Postecoglou-a'n kum 2023 June thla aṭang khan a enkawl ṭan a, season li daih inremna an ziak. Spurs tana season hnihna hmangtu Postecoglou chuan, "Kei chuan kum hnihnaah hlawhtlinna ka chang ṭhin, hei hi a la danglam lo ang.

"Tun hma pawhin season hnihnaah nomawi ka lo chawi tawh ṭhin, tunah hetiang thil hi a thlen leh beisei lo ni ila chuan ka sawi chhuak lo ang," a ti. Postecoglou hi a inringtawk hle a, a thusawi hmang hian tun season chu amah leh Spurs hi bukin an awm dawn a ni.

Tottenham hian tun hnai inelna hrang hranga an match hnuhnung pangaah vawi khat chiah hnehna an chang a, chuvangin Coventry mualah hnehna va chan ngawt hi thil awlsam a ni dawn lo a, thapui an thawh ngei a ngai ang.

Player ṭha an neih ho zingah Brennan Johnson chu danglamna siam thei tura ngaih a ni. Kum 23 mi forward hi mual sir leh laiah a chhawr thei a, Arsenal an hmachhawn ṭum pawh khan a hnawksak hle - zaninah Championship club tan dan a harsa mai thei a ni.

Coventry lamah Ellis Simms chu an hmachhuan tur a ni ve bawk. League Cup an match hmasa zawka Oxford United an hneh ṭumin goal a khung a, hei bakah hian league match an khelh hnuhnung bera Watford an inhnehtawk puina goal chu a khung a ni bawk - Spurts tlarhnung tana ven ngai tur a ni.

Inkhel dangah Premier League club pahnih Brighton leh Wolves te chu zanin dar 12:15 hian Falmer Stadium-ah an intawng bawk ang. Roberto De Zerbi thlaktu Fabian Horzeler-a'n hna a thawk ṭha nghal a, a team Brighton chu inkhel hmuhnawm a chhawhchhuahpui ṭhin.

EPL table aṭanga teh chuan parukna ni mek Brighton leh a mawng lama awm Wolves (18) dinhmun a inthlau rih hle, chutihrualin Cup inelna a nih tawh hi chuan a boruak a danglam ṭhin a, buk rit zawk tur sawi thiam a harsa.

Wolves pawh hi attacking football khel thiam an ni ṭhin, tun hnaiah erawh goal khung an harsa a, an tlarhnung a pawp bawk. League match vawi li aṭanga goal li khungin anmahni lamah vawi 11 a lut thung, zaninah a hnung lam an inven uluk a ngai hle ang.