September 23 aṭangin Pro Fight entry form lak theih dawn

Tualchhung boxing inelna ngaihhlut LPS Pro Fight a hnai chho zel. Inelna hmachhawn tum te tan September 23 aṭanga October 19 thlengin LPS Office, Zarkawtah entry form lak chhuaha theh luh theih a ni ang.

Pro Fight-ah hian Mizoram chhung leh pawn aṭangin kum 17 aṭanga kum 40 inkar a duh apiang tel theih a ni, senso erawh mahni intum tur a ni thung. October 23-ah boxer hriselna endikin an inbuk ang a, October 26-ah fixture tichhuakin ni hnih hnuah LPS Arena-ah inhnek an ṭan dawn a ni.

Nikum ang bawkin flyweight (kg 48-52), bantamweight (kg 52-56), lightweight (kg 56-61), welterweight (kg 61-67) leh middleweight (kg 67-74)-ah boxer-ten title an inchuh dawn a. Kum kal ta khan fly-ah boxer 108 telin an tam ber a, an tlemna ber middle-ah 14 an inlan.

Weight tina champion-in kawnghren leh Rs 60,000; pahnihnain Rs 30,000; semifinal-a tlain Rs 10,000 leh quarterfinal-a tlain Rs 5,000 an dawng dawn a. Mimal chawimawina tel loin lawmman pawisa fai Rs 6,50,000 sem chhuah a ni ang.

Champion laite duhthlan tur siamsak an ni a, an awmna weight-ah dinhmun ṭha seeded pek ni chungin an khel chho thei a, an duh chuan anmahni cho tur lo nghakin Title Fight-ah chauh an inlan thei bawk a, Title Fight bik hi khawvel huapa professional boxing chhinchhiahna boxrec-ah ziah luh tura ruahman a ni.