Jabeur tan season a tawp

Ons Jabeur chu dar hliam vangin a chawk mek a, Tunisian nula hian tun season chhungin tennis inelna a hmachhawn thei dawn tawh lo tih a puang zui nghal bawk.

Grand Slam final vawi thum khel tawh Jabeur hi kuminah hliam vangin a buai ngun hle, world ranking lamah pawh 22-naah a tlahniam tawh a, August thla khan Toronto Masters-ah Naomi Osaka a ngam lo, a hnu lamah a la inkhel leh lo a ni.

Kum 30 mi Ons Jabeur chuan, "Hliam hi infiamna in a kentel a ni a, keimah chauh ni loin midang pawhin an tuar ve bawk. Ka tan chuan kum harsa tak a ni a, infiammi nih chuan hliam neih hi thil hrehawm leh lungchhiatthlak a ni chiang hle.

"Ka dar hliam vang hian engtik hunah nge ṭha taka ka inkhelh leh theih mai ang a la hriat loh, tun season chhungin ka inkhel thei dawn tawh lo tih erawh ka sawi thei thung," a ti.

Jabeur hian tennis chawlhsan mai erawh a la tum lo, ruahman anga a awm thei a nih chuan kum 2025 tir lam aṭangin Austrlia rama inelna hmachhawn ṭan leh ngei a tum tih a sawi bawk.