San Siro-ah Liverpool-in hnehna hlado an chham

Nottingham Forest laka an mualpho hnu lawkah Liverpool an insiamṭha lehnghal a, Champions League-ah team lian zia chhuahin AC Milan an hneh - Reds hian 3-1 in hnehna hlado an chham a ni.

San Siro-a inkhelah mualneitu team tan Christian Pulisic chuan goal hmahruai a khung a, Liverpool fan-te an hlauthawng takzet. Mahse, Ibrahima Konate, Virgil van Dijk leh Dominik Szoboszlai ten goal khat ṭheuhin an chhanglet a, Reds an chak.

Premier League match hmasa pathuma an chak avanga fak an hlawh hnuin Liverpool hi Forest lakah an mualpho a, team ṭha AC Milan laka hnehna an chang leh thei ta hi Arne Slot leh a naute tan inrintawkna siamsaktu a ni ang - an la hmachhawn tur zingah Real Madrid leh Bayer Leverkusen an awm avangin Reds tan AC Milan hneh hi a pawimawh.

Barakhaih

San Siro-ah Liverpool-in puan dumin ban an hreng a, hei hi inkhel en tura Italy-a kal, motor-in a sut avanga a nunna chan ta, Liverpool fan Philip Dooley hriatreng nana ti an ni - team pahnih hian Dooley-a seat-ah pangpar an dah ve ve bawk. Liverpool-in Dooley hre reng chungin bul an ṭan a, mahse, goal an chhuah hma hle.

Minute thumna lekah Pulisic chuan goal hmahruai a khung a, 'Captain America' hming lem an pek forward hian ṭha zeta ball a tlan luhpui hnuin, Alisson-a tana dan rual lohin a chhuih goal.

Mahse, Liverpool an hnufual rei lo - minute 23-naah Trent Alexanader-Arnold-a free kick tawk tak chu Konate-a'n hnai zetah a tauh lut a, Reds-in si phurh an sut.

Minute 41-na a ni a, Liverpool centre back an che fuh laklawh tlat! Konstantinos Tsimikas-a corner aṭanga ball kal chu Van Dijk-a'n a khung ve leh a, chawlhlawk hmain hma an hruai fel der - minute 67-naah Cody Gakpo-a siamsak chu Szoboszlai-a'n khung ve lehin, Liverpool an chak dawn tih a chiang tawh.

An hmuhnawm

Inkhel ṭantir lamah Liverpool tlarhnung a nghing a, minute thumnaa goal an chhuah hma hian Tijjani Reijnders-a shot chu VVD-a'n ṭha zetin a dang hman. Mahse, goal an chhuah hnuah Liverpool an insiamrem a, an hmuhnawm takzet.

Mohamed Salah vanneih zan a ni lo a, Egyptian forward hian first half-ah bar vawi hnih a tihper hman a, AC Milan goalkeeper Mike Maignan chuan Gakpo khung ngei tur nia lang chu ṭha zetin a dang bawk.

Maignan hian Diogo Jota khung ngei tura lang pawh a dansak a, Portuguese forward nena ball an inchuhna lamah a inhliam zui - a tawpah chak phu zawk Liverpool an chak a, Forest laka an tlawm avangin sel hlawh mah se, Slot-a team-in tluk hlen an tum lo tih an pholang.

"Forest lakah kan tlawm a, zaninah hma takah goal kan chhuah bawk - khatiangah kha chuan eng tiang takin nge kan khelh leh ang tih in lo ngaihtuah a nih pawhin a awm e. Kan khel ṭha takzet a, hetianga khel thei team hian engtin nge mahni mualah Forest kha kan ngam theih loh zawk le? "
- Arne Slot, Liverpool manager