Arsenal inlan hun a thleng ve ta

Ningani zan ni mah se Arsenal khelh tur hi Champions League tho a ni, European football inelna sang ber kalphung an thlak a, a khelh hun pawh a danglam - zanin dar 12:30 hian Mikel Arteta nauten Atalanta an lenchilh ang.

Arsene Wenger hun a liam a, tunah chuan Arteta hnuaiah an khel tawh - North London club hian zawimuangin hma an sawn a, an manager ropui Wenger hoa an la tih theih ngai loh UCL nomawi erawh tunah pawh an la hnaih rih lo.

Chutihrualin, hun rei tak hnuah season hmasa khan UCL an khel a, round tir lamah chuan boruak an ngam angreng viau. Tun season pawh hmasawn an tum ngam ang, mikhual team zawk ni mah se an buk a rih zawk a rinawm.

Arsenal manager Arteta tan ngaihtuah tur a tam - Tottenham nen match hautak an khel zo chiah a ni a, zanin an match bakah hian kar tawpah Premier League champion Manchester City an lenchilh zui leh nghal dawn bawk.

Gunners hian EPL nomawi chawi an châk, chuvangin zanin hian an player neih ṭhat zawng zawng an chhawr kher lo ang. Kerek hliam vangin captain Martin Odegaard chu a la inlan thei dawn lo; Declan Rice erawh duh chuan chhawr theih a ni thung.

Spurs lakah Jorginho leh Thomas Partey an inkawp a, anni pahnih bawk hian Italian club an hmachhawn a nih pawhin a mak lo ang. Damkawr Gabriel Jesus chuan khelmualah hun a hman rei hret a rinawm tawh bawk.

Defender Riccardo Calafiori a la hliam bawk, ani pawh hi a inlan a la rinawm loh. Jurrien Timber a dam ṭha tawh a, Dutch defender hian Spurs lakah rintlak a nihzia a taka a lan tir avangin a chungah rinna an nghat chhunzawm ngei ang tih a rin theih bawk.

Atalanta pawh hian Arsenal nen inanna lai an nei, coach Gian Piero Gasperini kaihhruaina hnuaiah an indinthar a, kum riat liam ta khan Atalanta hi enkawl ṭanin attacking football hmuhnawm an chhawp chhuak a, season hmasa khan Europa League nomawi an chawi hial.

Kum 66 mi Italian mi a ni a, Grugliasco lam mi ni mah se hna a thawh ṭhat em avangin a hna thawhna Atalanta inbenbelna Bergamo chuan khua leh tui nihna an pe hial, an khawpui mite thlawpna a hmuh ṭhat dan tur chu hemi aṭang hian a chhut theih.

Tun season bul ṭan nan Real Madrid nen UEFA Super Cup an khel a, 2-0 in an chak lo. Serie A lamah erawh Lecce 4-0 a sawpin bul an ṭan thung a, goal khung an la thiam reng tih chu a takin an lantir - tlarhnung phui tak Arsenal lakah eng ang tak nge an nih hmuh a châkawm hle.

Gasperini chuan, "Arsenal hi Premier League team ṭha berte zinga mi an ni, tun hnai season hnih thlir phei chuan Manchester City leh Liverpool te nen an hlauhawm hle, chuvangin anni hmachhawn hi a awlsam dawn lo.

"Ball kangah an hlauhawm tih ka hria, hei chu a ven dan tur pawh kan ngaihtuah. Ball kangah chauh a ni lo, ball an tlanpui leh chetvel dan hi fimkhur taka hmachhawn ngai chi an ni," tiin a sawi a, mikhual thleng turin a inpeih tih a sawi bawk.